Yingxubakaxaka phakathi kweSebe lezeMfundo kwakunye negosa lalo!
Igosa likarhulumente waseMpuma Koloni uVuyiseka Mboxela onqunyanyisiweyo.
Image: Facebook
ISebe lezeMfundo eMpuma Koloni liziphikisile iingxelo ezikhutshwe ligosa elinguMlawuli kwezoNxibelelwano elinqunyanyisiweyo uVuyiseka Mboxela, nochaze kwimbalelwano noonondaba ukuba ubuyele emsebenzini ngoMvulo umhla wesithathu kweyeNkanga 2025.
UMboxela wanqunyanyiswa emsebenzini kwiinyanga ezimbini ezidlulileyo ngenyanga yeThupha ngezityholo eziliqela eziquka ukuphatha gwenxa umsebenzi ongumqheliswa, intern, ngamanye.
Wanqunyanyiswa ngexesha elinye noVelani Mbiza-Gola osisithethi soMphathiswa wezeMfundo kweli phondo uFundile Gade.
UMboxela ubuyele emsebenzini ngelithi ziphelile iintsuku ezingamashumi amathandathu (60) enqunyanyisiwe, nto leyo ayichaze njengexesha elisemthethweni lokunqumamisa kuphandwe umsebenzi karhulumente okwisikhundla esifana neso akuso.
ISebe lezeMfundo eMpuma Koloni kusasa ngoLwesibini, likhuphe imbalelwano lisithi akukho bunyani kwintetho kaMboxela noonondaba, kwaye kuhlabana nemiqathango anqunyanyiswe phantsi kwayo.
Othethela eli Sebe, uMali Mtima, uthi: "Ngengomntu okwisikhundla solawulo, nosebenze njengesithethi sikaMphathiswa, uMboxela uyayazi indlela yokuziphatha ngokufanelekileyo."
UMtima ukwathe iSebe liza kumthabathela amanyathelo uMboxela njengoko isenzo sakhe sokuzibuyisela emsebenzini ingekagqitywa inkqubo yoluleko singekho mthetheni.
Kwileta ebikhutshwe nguMboxela koonondaba ikwaveze ukuba inwenwiselwe umhla wama26 kule nyanga unqumamiso lwakhe liSebe.
UMboxela ukwathe: "Andifuni kubalwa kuluhlu lwamagosa aphezulu ahlala emakhaya kodwa abe erhola imivuzo etshisiweyo ngurhulumente."
OkaMboxela uthembise ngokwazisa abeendaba ngenyathelo elilandela ingxelo ekutshwe liSebe lezeMfundo.