UHlabisa umemelela ukugxothwa kwabemi bangaphandle abangekho mthethweni
UVelenkosini Hlabisa umemelela ukugxothwa kwangoko kwabemi bamazwe angaphandle ngokungekho mthethweni.
Image: Department of Cooperative Governance and Traditional Affairs / Facebook
Inkokeli yeNkatha Freedom Party (IFP) uVelenkosini Hlabisa umemelele ukugxothwa kwabemi bamazwe angaphandle abangekho mthethweni ngoko nangoko.
UHlabisa uthe nangona i-IFP ixhasa ukufuduka kwabantu abanezakhono ezinqabileyo, ufuna urhulumente abagxothe bonke abo bakweli lizwe ngokungekho mthethweni.
Ukuthethe oku ngoMgqibelo ngethuba kubhiyozelwa iminyaka engamashumi amahlanu (50) yeIFP eJabulani Amphitheatre, eSoweto, eGauteng.
"Siyi-IFP sihlala sizibophelele kumba wabemi bangaphandle abangekho mthethweni, siya kuhlala sinyanisekile kwisibophelelo esasenza kuni. Nangoku, kwiGNU, i-IFP ichasene nabaphambukeli abangenazimpepha abasuka kumazwe angaphandle abangenazo izakhono ezinqabileyo esizidingayo kwaye kufuneka babuyele kumazwe abo," utshilo uHlabisa.
UHlabisa uthe i-IFP ihleli "ime ngxi" kumba wabemi bamazwe angaphandle abangenazimpepha, esithi abemi bangaphandle abangekho mthethweni bacinezela inkqubo yezempilo yoMzantsi Afrika kunye nezinye iinkonzo zoluntu.
"Abantu bakuthi bafika ezibhedlele bafike amayeza ephelile kuba athathwa ngabemi bangaphandle abangekho mthethweni abasuka kwamanye amazwe," utshilo.
"I-IFP ihleli ngaphakathi kwiGNU, ayisebenzeli naliphi na iqela lezopolitiko kodwa imele abantu baseMzantsi Afrika," wongeze watsho.
UHlabisa uthe lo mbutho uxhasa ukufuduka kwabantu kuphela abanezakhono ezidingwa lilizwe.
"Abo bantu kufuneka babhaliswe ngokufanelekileyo kwaye baziwe apho bahlala khona. Kufuneka bahlawule irhafu njengathi sonke kwaye bathobele iSARS njengathi sonke," utshilo.
Uthe uninzi lwabemi bamazwe angaphandle kweli loMzantsi Afrika abanazo izakhono ezizodwa, kwaye i-IFP iza kusebenzisana namasebe karhulumente ukugodusa abo bakweli lizwe ngokungekho mthethweni.
"I-IFP iza kuhlala ililizwi lakho elomeleleyo kuba siyazi ukuba uninzi lwabemi bamazwe angaphandle eMzantsi Afrika abanazo izakhono ezizodwa," utshilo uHlabisa.
"Siza kusebenzisana nawo onke amasebe karhulumente ukubabuyisela kumazwe abo ukuze amathuba emisebenzi athathwe ngabemi bangaphandle abangaqeqeshelwanga le msebenzi afunyanwe ngabemi boMzantsi Afrika."
Uthe i-IFP ayizukubavumela abantu bangaphandle abangekho mthethweni ukuba bajongele phantsi ulawulo nokhuseleko loMzantsi Afrika.