NPA: 'Umfundisi waseBhayi owabulalayo akakhululwanga kuba angagrogrisa amangqina ngaphandle'
ULithaliyanda Ntini (12) owabulawa kabuhlungu kwinyanga ephelileyo ngumfundisi uSonwabo Nqayi (39) nokwangumyeni kasisi wakhe eMotherwell eBhayi.
Image: FACEBOOK
UMfundisi webandla iHoly Burning Fire Ministries of God eBhayi, uSonwabo Nqayi (39), nojongene netyala lokubulala intwazana yakulo nkosikazi wakhe, uLithaliyanda Ntini (12), uyalelwe ibheyile kuba iNPA ikholelwa kwelokuba angalibaleka eli tyala kwaye afike agrogrise namangqina ngaphandle.
UNqayi uvele okukuqala ngqa ngomhla wama30 kwinyanga ephelileyo kweyeSilimela kwinkundla yamatyala yaseMotherwell nobevela okwesibini kusasa namhlanje uLwesine nalapho ebefaka isicelo sebheyile.
Ukubanjwa kwakhe kuza emva kokuba ngomhla wama24 kweyeSilimela wenyanga ephelileyo, waxhwila uNtini wamsa kwihlathi elikwaNU6 eMotherwell apho wambulalayo akugqiba wamtshisa. Ixhoba lachazwa lusapho lwalo njengelilahlekileyo kwisikhululo saseMotherwell emva kokuba engazange abuye ethunywe emini evenkileni. Umzimba wentwazana le wabhaqwa ekuzeni kusa ngezithuba zentsimbi yesibini ngosuku olulandelayo kweli hlathi ngamaPolisa xa wayekhangelwa.
Isithethi seNPA uLuxolo Tyali uthi zibeyimpumelelo iinzame zabo zokuba angafumani bheyile lo mfundisi nanjengoko kubonakala ukuba angalibaleka eli tyala futhi agrogrise namangqina.
UNqayi uza kuvela kwakhona ngomhla wama28 kwinyanga ezayo kweyeThupha kwiinkundla zamatyala eMotherwell nanjengoko kusenziwa uphando oluphangaleleyo. Ushiyeke ngaphakathi eziseleni.
INPA ithi izimisele ukuqinisekisa ukuba amaxhoba obundlobongela ayalweleka.