IMK Party inika uRamaphosa de kube nguLwesihlanu ukuba abeke phantsi

Umbutho uMkhonto weSizwe (MK) unikezele ngokusesikweni ileta yesinyanzelo kuCyril Ramaphosa, umbongoza ukuba arhoxe njengoMongameli ngentsasa (9am) yangoLwesihlanu, umhla we18 kweyeKhala.

Kwileta ebonwe yi-IOL, phakathi kwezinye izinto, iMK Party ixelele uRamaphosa ukuba isigqibo sokutyumba uNjingalwazi uCachalia njengeBambela likaMphathiswa wamaPolisa sinyhasha uMgaqo-siseko, kuba esi sifundiswa asilolungu leKhabhinethi okanye leNdlu yoWiso-mthetho.

Isithethi seMK Party kuzwelonke, uNhlamulo Ndhlela, uthe uRamaphosa kufuneka abeke phantsi njengendlela yokunika imbeko uNelson Rolihlahla Mandela, nowayeyinkumanda eyintloko eyasaka uMkhonto weSizwe – iphiko lomkhosi.

"Ukuba uRamaphosa uyasilela ukuthobela eli khwelo, iMK Party iza kulandela uthotho lwamanyathelo asemthethweni nanoxolo, aquka ukumangalela ngokomgaqo-siseko, isiphakamiso ePalamente sokuba simvotele ukuba aphume esikhundleni sakhe kwaye sihlanganise abantu kwilizwe lonke ukuba baqhankqalaze," utshilo uNdlela.

"La manyathelo abonakalisa intando yabantu, abathe, ngentando yesininzi, baqinisekisa ukuba abayinyuli iAfrican National Congress (ANC) ukuba ilawule phantsi kobunkokeli bukaRamaphosa."

Uthe, nangona "umyalezo ocacileyo" ovela kubavoti, intando yabantu iye yaphazanyiswa yimibutho yezopolitiko ecingela izisu zabo.

Ngexesha lonyulo lukaCanzibe ngo2024, iANC yafumana nje i40% yeevoti, isilela ukugcina isininzi sayo ePalamente ekudala sinayo iminyaka emininzi.

"Lo rhulumente obizwa ngokuba ngurhulumente wobumbano (GNU), noquka iDemocratic Alliance, iFreedom Front Plus, kunye namahlakani abo, wayibeka kwakhona le ANC eyavotelwa ngabemi boMzantsi Afrika ukuba ingaphathi. Oku kubangele umsindo kuluntu ngokubanzi kwaye kubonisa ukujongelwa phantsi koxanduva lokuphendula ngokwentando yesininzi," utshilo uNdlela.

"Izinto ezityhilwe mva nje nguNjengele Mkhwanazi zibhentsisa iGNU njengendibano enobuqhophololo obunzulu, ehambelana nolwaphulomthetho kunokuba negunya lomgaqo-siseko lokusebenzela abantu."

Uthe iMK Party ibona iGNU “njengeyona nkohliso yezopolitiko iyingozi” kuMzantsi Afrika wentando yesininzi, wongeza ngelithi ulungelelwaniso lwezopolitiko lwenza ukuba kuqhubeke ukubiwa komhlaba, izibonelelo kunye nesidima.

"IMK Party ibongoza uCyril Ramaphosa kunye neGNU ukuba bahloniphe ilizwi labantu ngaphambi kokuba umonakalo ongenakulungiseka wenzeke kumaziko entando yesininzi eMzantsi Afrika. Ngoku lixesha lokuphendula kunye nobunkokeli obusesikweni," utshilo uNdlela.

Ngaphambili, i-IOL inike ingxelo yokuba njengoko izitalato zaseDurban bezigcwele qhu ngabantu ababongoza ubulungisa, abahlali baseSoweto kunye nabaxhasi bakaLieutenant General Nhlanhla Mkhwanazi nabo bangene ezitalatweni bexhasa lo Mkomishinala wamapolisa eKZN ngoLwesibini.

Lisuka eThokoza Park lisingise kwisikhululo samapolisa eKliptown, eli qela lincinci likhale ngokubhubha kooceba kunye namanye amatshantliziyo amatyala awo okubulala angekasonjululwa, logama ulwaphulomthetho luqhubeka nokungalawuleki.

EDurban, abaxhasi bakaMkhwanazi babambe umngcelele ukusuka eCurries Fountain ukuya eHoy Park beyokuhambisa uxwebhu, bememelela ukuba lo Mkomishinala wamaPolisa akhuselwe.

Lo mngcelele ulandele indibano yakhe noonondaba kutshanje, ebhentsise ubuqhophololo obunengcambu obunzulu kwiSAPS.