AbakwaSASSA balumkisa abo bangayithobeliyo inkqubo yohlaziyo
AbakwaSASSA balumkisa abantu abangayithobeliyo inkqubo yayo.
Image: Umfanekiso ogciniweyo
ISouth African Social Security Agency (SASSA) ilumkise ngelithi ukusilela ukuthobela inkqubo yohlaziyo kungakhokelela ekunqunyanyisweni, okanye ukuphelelwa umphelo kwezibonelelo zabantu.
Oku kuza emva kwenkqubo entsha yokuqinisekisa yakwaSASSA ekhokelele ekulibazisekeni ukuhlawulwa kwezibonelelo kwabanye abantu.
Umphathi wakwaSASSA uThemba Matlou uthe ukuqhubeka nokungathotyelwa kwemigaqo kungakhokelela ekuphelelweni ngokusisigxina kwezibonelelo zabo.
"Abaxhamli mabayazi ukuba iSASSA ikwagunyaziswe ngumthetho ukuba ibuyise nayiphi na imali ebihlawulwe kumxhamli ngendlela engeyiyo. Oku kuthetha ukuba, xa sifumanisa ukuba ubufumana izibonelelo ubungafanelanga ukuzifumana, iSASSA iyakumisela inkqubo yokubuyisela ityala apho kuya kufuneka uhlawule imali," utshilo uMatlou.
UMatlou ukwadize ukuba kungaphezulu kwe140 000 imiyalezo ethunyelwe kubantu abafumana izibonelelo abakhethelwe olu hlaziyo. Nangona kunjalo, uMatlou uthe ukungaphenduli kubonisa ukuba abanye abaxhamli basenokwenzeka ukuba batshintsha iinkcukacha zabo zoqhagamshelwano kodwa basilela ukwazisa iSASSA.
UMatlou uvumile ukuba ngelixa iSASSA yabhengeza utshintsho ngamaqonga osasazo ohlukeneyo, abanye abaxhamli basenokuba bayiphosile le nto.
ISASSA ikwasebenza nzima ukwenza inkqubo kumnatha apho abantu banokuyisebenzisa ukuze bagqibezele uhlaziyo lwabo ukuze banciphise imigca kwiiofisi zasekuhlaleni.
Abo bangakhange bazifumane izibonelelo zabo bayacetyiswa ukuba bandwendwele iofisi yakwaSASSA ekufuphi kubo okanye batsalele umnxeba ku0800 60 10 11 okanye batyelele ku-www.sassa.gov.za.