Udliwanondlebe noLuthando Mzi

Ngokubhalwe ngu: LIHLE SOKAPASE

ULuthando Mzi (29) waseDimbaza kwilali yaseZabalaza yimvumi ekwanguye nomlingisi kwimidlalo kamabonakude nonomathotholo. Ukhe wabonakala kumabonakude xeshikweni ebedlala indima yomlinganiswa okuthiwa nguDali kwinkqubo edumileyo egama lithi ‘Gqeberha: The Empire’. Ukanti ke sikhe samva nakwinkqubo kanomathotholo kuMhlobo Wenene FM egama lithi ‘Ithini Na Le Nto? Leyo Yimfihlelo Yobomi’, apho ebedlala indima yomlinganiswa ekuthiwa nguQhinebe.

Kule nyanga imiyo yeThupha lo xholovane wezolonwabo uza kube ekhupha icwecwe lakhe elinesihloko esithi, ‘Zingce Mzontsundu’. I’solezwe lesiXhosa likhe lahlala phantsi nale mvumi lancokola nayo ngelifuna ukwazi banzi malunga nohambo lwayo kwezolonwabo ukuza kuthi gaa ngoku, kwakunye neenjongo zayo ukubheka phambili. Imibuzo yethu kwakunye neempendulo zikaLuthando ziyalandela apha ngezantsi:

I’solezwe lesiXhosa (IL): Luthando, njengegcisa elinezakhono ngezakhono ezahlukileyo, sele uziqaqambisile emculweni nanjengomlingisi kumabonakude nakunomathotholo, ingaba uyiqhuba njani yonke le misebenzi yahlukileyo ngaxeshanye? Futhi ingaba lukhona uhlobo lobugcisa othi lolona uziva usekhaya xa ulenza?

Luthando Mzi (LM): Zonke bhuti ezi zipho ziyintsikelelo kum ngoko ke ndizithanda zonke ngokwahluka kwazo.

IL: Umsebenzi wakho xeshikweni ubudlala indima yomlinganiswa ekuthiwa nguDali kwiGqeberha: The Empire ubumhle kakhulu. Ungasithela thsuphe ngamava nendlela ozive ngayo ngexesha ubudlala le ndima, nendlela ozifake ngayo ezihlangwini zomlinganiswa?

LM: Ukusebenza kwiGqeberha: The Empire bekumnandi kakhulu kwaye nabanye abalingisi abanjengoThulani noAnathi ngabantu ekusebenzeka kamnandi nabo, nabasebenzi bonke ngokubanzi.

Ukunika ubomi nakomphi na umlinganiswa kufuna uqale umqonde kakuhle loo mlinganiswa ukuba ungumntu onjani na. Emva koko ke ube nguye ngokupheleleyo kutsho kube lula ukonwabela indima yakhe.

IL: Icwecwe lakho elinesihloko esithi ‘Zingce Mzontsundu’ liza kuphuma msinyane. Sicela usixelele impembelelo kunye nemixholo ogangatha phezu kwayo kweli cwecwe.

LM: UZingce Mzontsundu usukela ekubeni ndisenza umculo okuthiwa yiUkombela African Trap and Soul apho ndithe ndadibanisa isandi semveli nesandi esikhoyo ngoku. Kwaye uZingce Mzontsundu ukwaligama lomsitho wam kunye nomhlob’ am okwayimvumi uXoliseka Blou esiza kuwulontsha kungekudala, apho sithi wonke ontsundu makazingce ngobuyena. Ngale EP sikwazama ukugaya imali yokuxhasa loo msitho.

IL: Njengemvumi, uyazazi iintlobo ezahlukileyo zomculo. Ungasichaza uthini isandi nesingqi esilapha kweli cwecwe, kwaye ingaba ikhe yaba khona imingeni ekhethekileyo ngelixa ubusenza le EP?

LM: Isandi sale EP ithi Zingce Mzontsundu yiUkombela African Trap and Soul. InesiNtu kodwa ngokwesandi solutsha lwanamhlanje.

Akukhange kubekho mingeni ingako ngaphandle kokuba njengemvumi ezimeleyo kumele ndibhatalele yonke into ngokwam.

IL: Bangalindela ntoni abathandi bomculo kweli cwecwe lakho litsha? Ingaba akhona amabali okanye iimvakalelo ozivakalisayo eziqondene nawe ngqo?

LM: Abantu bangalindela ukuphila nokukhuthazeka kuba sibulela ukuphila nezinto zonke esinazo, sibulela uNyangelemihla oseNyangweni. Bangalindela nokuba sikhuthalele ukujongana neli xesha loxinezelelo lwengqondo.

Ewe lo mculo uqale uthethe nam ukhuthaze mna, uphilise mna.

IL: Ingaba lutshintshe njani uhambo lwakho kwezobugcisa ukusukela kwiintsuku zakho usafika ukuza kuthi gaa ngoku? Ingaba zikhona izifundo ozifundileyo emculweni okanye ekulingiseni?

LM: Kudala ndandixhomekeke ngento yonke kwiiproducers kodwa ngoku ndingumntu oziqambelayo izandi nendlela endibhala ngayo ayifani nangokuya ndandikhula kuba ngela xesha ndandisazi ezobuntwana, kodwa ngoku ndibhala ubomi ndithandaze ndikhuthaze, kuba nam ndiyangqamana nalo mculo. Kudala wawungadlali kakhulu kunomathotholo kodwa ngoku uyadlalwa. Ekulingiseni into endiyifundileyo kukwazi ukuba ndenzani ngaphaya komboko nangaphaya kwekhamera, kukuzithemba nokuwuhlonipha umsebenzi ngokunjalo.

IL: Ingaba kwezi zakhono zakho zahlukileyo sikhona oqonda ukuba sikwenza uzivakalise kakuhle ngcono, okanye zonke zilulutho kuwe ngeendlela ezahlukileyo?

LM: Zonke bhuti ziyafana, kuzo zonke ndiyaphila ndiyagcoba xa ndizenza ngoko ke zonke zingabantwana bam.

IL: Intsebenziswano idla ngokudlala indima ebalulekileyo emculweni. Ingaba uye wasebenzisana nezinye iimvumi xeshikweni ubesenza eli cwecwe lithi ‘Zingce Mzontsundu’? Ukuba kunjalo, loo ntsebenziswano iyiphuhlise kanjani indlela elenziwe ngayo eli cwecwe?

LM: Hayi bhuti, andikhange ndibenetsebenziswano ngaphandle nje kokusebenza noAndy Beats waseAfrica Unite Records kule EP.

IL: Lo mkhakha wezolonwabo sele unemingeni emininzi edume ngayo. Yintoni eqhuba intshisakalo yakho kunye nokuzinikela kwakho kumsebenzi wakho, kwaye uhlala njani ukhuthazekile xa ucinga ngemiqobo enokubakho kule ndlela?

LM: Ndinethemba lokuba ikhona indawo yam kwaye le nto ndiyiphetheyo inawo amandla kwaye ndinethemba kulowo undiphumelelisayo. Uzuko ndilunika yena uNyangelemihla uThixo oseNyangweni. Iingxaki okanye imingeni ndiyijonga njengethuba lokunyuka ndifunde into entsha.

IL: Umsebenzi wakho unamandla okuba nefuthe kwaye ukhuthaze abanye abantu. Ingaba kukho imiyalezo ethile okanye imixholo othemba ukuba abaphulaphuli bakho baya kuyithatha kumculo wakho nemidlalo oyenzayo kumabonakude nakunomathotholo?

LM: Umxholo nomyalezo wam kukuphilisa, ukuvuselela uthando, ukubulela kuMdali, nokubongoza kuMdali kuyo yonke loo nto yokonwabisa abantu bakowethu.

IL: Njengoko umsebenzi wakho uqhubeka ukhula, ingaba unawo umsebenzi wamaphupha akho onga ungawenza wakube ufikelele kwinqanaba elithile apha kwezolonwabo?

LM: Ewe kunjalo, ngaphandle komculo nokulingisa, yimisitho nezinye ke izinto.

IL: Leliphi icebiso onalo ongalinika abo banqwenela ukuba ziimvumi nabadlali beqonga, abantu abanga bangazibalula kulo mkhakha wezolonwabo?

LM: Iimvumi mazifundeni eli shishini lomculo kangangoko. Njengeemvumi ezizimeleyo masizame kubekho into esiyenzayo emacaleni eza kusifakela imali sikwazi ukuyityala kumculo wethu. Kubalingisi ndithi masikhangele iiarhente zikamabonakude nezikanomathotholo sifake iidemo zethu, okanye siye xa kukho iiauditions. Kuyo yonke loo nto masizifundiseni ngalo mkhakha sifuna ukuba kuwo.

IL: Abalandeli bakho nabathandi bomculo gabalala banganxibelelana njani nawe?

LM: Ikhasi lam liyafumaneka kuFacebook, igama lalo nguLuthando Mzi, ukanti ke ndikwanguye nakuTwitter. KuTiktok NdinguLuthando Mzi EC. Umculo wam uyafumaneka ku-iTunes, YouTube, Spotify, Amazon, nakumanye amaqonga e-intanethi.