UBukhosi uzakhela udumo kwiMuvhango
ITYENDYANA laseTinarha (eyiKariega kule mihla) uBukhosi Ngcingolo, ufumene ithuba lokudlala kumdlalo kamabonakude iMuvhango.
UNgcingolo, 28, uqale kule veki ukuvela kulo mdlalo weSABC2 edlala njengomncedisi kwindawo yokutyela.
Enemincili, ebalisela I'solezwe lesiXhosa, uNgcingolo unethemba lokuba ukufumana indima kwiMuvhango sisiqalo sokuqaqamba kwesakhono sakhe sokudlala kwimidlalo kamabonakude.
Ukhe wavela kancinane kwimidlalo efana neGenerations: The Legacy, Diep City, The Estate, Gomora, Kings of Joburg, Skeem Saam neScandal.
“KwiMuvhango yindima yexesha elide endiza yidlala njengomsebenzi (waiter) kwindawo yokutya ebizwa Intimate Lounge. Ndinqwenela ukufumana indawo esisigxina ukuze ndibonise ngesakhono sam. Ndikwafuna nokudlala kwimidlalo yeqonga ukuze ndandise isakhono sam,” kutsho uNgcingolo.
Umdla kaNgcingolo wokudlala kwimidlalo kamabonakude uqale ngo2017 eseThekwini.
“Ndandibanomdla xa ndikhaphe umhlobo wam owayengumdlali weqonga. Le nto yaye yakhula kum, ndanomdla wokuyilandela ukuze ndibone iza kundithatha indibeke phi,” utshilo.
UNgcingolo uthi ngo2018 wenza isigqibo sokuthuthela eRhawutini ukuze alandele eli khono.
“Bendisiya kwii-odishini eziliqela kodwa ndingabinathamsanqa, andizange ndilahle themba ndaphinda ndazama nakulo nyaka, nanjengoko ke uzibonela [ndikwiMuvhango],” kutsho eli tyendyana, elikhe lavela njengondwendwe nakwinkqubo yencoko kamabonakude iDaily Thetha.
Ukanti ngomhla wokuqala kweyoMsintsi, uNgcingolo uza kuvela kwinkqubo entsha yeSABC1 yokuzikhangelela iqabane ethi Too Hot To Be Single Season 2. Le nkqubo iza kuqala ukusasazwa ngoLwesine, umhla wokuqala kweyoMsintsi 2022.