ISIKHULU sakwaMahindra South Africa uRajesh Gupta noRian Coetzee wakwa-IDC besayina isivumelwano sokusebenzisana
I-MAHINDRA South Africa isithathe elinye igxathu ekuzinzeni eNingizimu Afrika ngokusayina isivumelwano sokusebenzisana phakathi kwayo ne-Industrial Development Corporation (IDC) ngenhloso yokwenza ucwaningo ngokuvula enye ifemu yezimoto eNingizimu Afrika.
Le nkampani yase-India ivele inefemu eyakha iveni iPik Up eDube Tradeport, eThekwini. NgeSonto bekujatshulelwa ukukhiqizwa kweveni lika-25 000 kuyona.
Ivele isezinhlelweni zokwandisa umthamo womkhiqizo kule femu.
Isivumelwano esisayinile ne-IDC ngesokucwaninga mayelana nokukhiqiza kuleli kubhekwa izinto ezithinta imihlomulo etholwa yimboni, amathuba akhona okudayisa ngaphandle, ukuthuthukisa abasebenzi, ukuthuthwa nokulandwa kwempahla, indawo ifemu engase ibe kuyo nokuthi iMahindra ingangena kanjani ezimotweni ezihamba ngezinto ezingayingcolisi imvelo amaNew Energy Vehicles (NEV).
Isikhulu sakwaMahindra South Africa, uRajesh Gupta, sithe ukukhiqiza amaPik Up angu-25 000 kuwubufakazi bokuzibophezela kwabo eNingizimu Afrika.
“Njengoba siqhubeka nokuqinisa ukusebenza kwethu lapha, lesi sivumelwano sizosivumela ukuthi sibheke amathuba okwandisa imikhiqizo yethu,” kusho uGupta.
Uthe yize isivumelwano siveza inhloso yabo yokubheka amathuba okukhiqiza kuleli kodwa kusawucwaningo okwamanje akukho ukuzibophezela okukhona ngokuvula ifemu. Ucwaningo luzokwenza iMahindra ne-IDC bahlole kahle ngaphambi kokuthatha isinqumo.
Obambe njengesikhulu ophikweni lwe-Industry planning and project Development kwa-IDC, uRian Coetzee, uthe lolu cwaningo luhambisana nezinhloso zeSouth African Automotive Master Play (SAAM) 2035 ezigxile ekuqiniseni ukuncintisana kweNingizimu Afrika namazwe omhlaba njengendawo yokwakha izimoto.
“Kuzoya ngomphumela wocwaningo kodwa likhona ithuba lokuthi inkampani inyuse umkhiqizo wayo eNingizimu Afrika nokuyinto engase idale amathubba omsebenzi,” kusho uCoetzee.
Related Topics: