UMakhubele ubeke phantsi njengelungu leMK Party , ePalamente

UColleen Makhubele ubeke phantsi njengelungu lePalamente lombutho woMkhonto weSizwe Party (MK Party). Ukubeka phantsi kwakhe kulo mbutho kuza emva kokuba kutshanje ebesandul' ukususwa kwisikhundla ebekuso sokuba nguMbhexeshi walo mbutho ePalamente.

UMakhubele ubelilungu leMK Party ePalamente ukusukela kweyoMqungu ka2025 noye wonyulwa njengoMbhexeshi kuCanzibe ka2025.

Kwesi sikhundla ebeseneenyanga ezisibhozo ekuso phambi kokuba asuswe kwinyanga ephelileyo.

Kwezinye iinkcukacha zeleta ayibhalele inkokheli yeMK Party nowayesakuba nguMongameli weli uJacob Zuma, uthe uyagqibelisa ngoLwesihlanu wale veki.

Ukwabulele ithuba athe walinikwa ngokaZuma lokuba asebenzele ilizwe loMzantsi Afrika nombutho weMK Party.

UMakhubele uthi esi sigqibo asithabathileyo usicingisisile.

UMakhubele ukhuthaze amanina kwakunye nolutsha ekubeni abokwenza isigqibo esakuthi sibenegalelo ekwakheni eli lizwe.

Khange ayeke ukutyabeka uZuma njengenkokheli enesakhono solawulo, esithi ungumzekelo kubantu abatsha kulo lonke eli loMzantsi Afrika.

UMakhubele ungene kulo mbutho kweyeSilimela ka2024, emka kumbutho wakhe, uSARA.

IMK Party sele yenze isaziso apho ibeke uMmabatho Mokoena-Zondi njengoMbhexeshi omtsha.

UMokoena-Zondi, nowayesakuba yinkokheli kwiANC Youth League, ngoku ebesele enguMbhexeshi kwiBhunga lamaPhondo (NCOP).

I-IOL News izenzile iinzame ukufumana uluvo kwisithethi seMK Party uNhlamulo Ndhlela kodwa ngaphandle kwelize de labe liyapapashwa eli nqaku.