Kufuniswa ngomrhanelwa obandakanyeka ekubulaweni kwePolisa laseGcuwa
Indoda ekhangelwa ziHawks zaseMpuma Koloni malunga netyala lokudutyulwa kubulawe uNdodomzi Dion Tengile eZizamele.
Image: HAWKS
Abecandelo lokulwa ulwaphulomthetho, Ookhetshe kwindawo yaseMonti, baphantsi phezulu bekhangela umrhanelwa osemfanekisweni obandakanyeka kwityala lokudutyulwa kukaSajini Ndodomzi Dion Tengile (42) kwilokishi yaseZizamele eGcuwa ngo2024.
UTengile, wayesebenza kwisikhululo samaPolisa esikwidolophu yaseSajonisi. Ookhetshe kudala becela uncedo eluntwini kuba befuna usapho lakwaTengile lifumane ubulungisa.
Ngokwengxelo kaWarrant Officer Ndiphiwe Mhlakuva ithi esi sehlo sokubulawa kukaTengile senzeka ngomhla wesibini kweyoMdumba ngo2024, imihlanu imizuzu ibethile intsimbi yesibini ezinzulwini zobusuku.
Kungethuba uTengile wayesuka eSajonisi ehamba nenkosikazi yakhe bemisa kwibhanka esedolophini eGcuwa bekhupha imali ematshinini (ATM).
Emva kokuba bekhuphe imali babuyela kumzi wabo oseZizamele Township.
UMhlakuvana uthi ngethuba besohlika, esashiyeke ngaphandle emotweni uTengile, kwavela amadoda amabini exhobe ngemipu amdubula amshiya ebhubhile emva koko ayokuhlasela unkosikazi endlini athatha imali kwakunye nebhegi enento zakhe akonzakaliswa.
Abarhanelwa baye babaleka ngeToyota Fortuner yakhe uTengile. Ityala lokubulala laye lavulwa kwaye uphando ladluliselwa kookhetshe. Imoto kaTengile yabhaqwa inyengeziwe kude kufuphi nekhaya lakhe.
Ookhetshe babongoza nabani na onokuba nolwazi obunga qinisa ubungqina malunga nesehlo solwasuku.
Lowo unento ayaziyo angatsalela uColonel Raymond Buys ku: 082 301 1135 okanye uWarrant Officer Sandisile Zenzile ku082 772 3664 kungenjalo atsalele eyamahala 08600 10111 noMySAPS App. Onolwazi uzakukhuseleka kwaye bangangazichazi magama.