UNqatha ubongoza intsebenziswano kubaqhubi ezindleleni emva kwengozi eQonce
Basixhenxe abaphulukene nobomi babo ngentsasa yangoLwesithathu kwingozi eyenzeke kuN2 kudekufuphi naseBulembu Airport ngaseQonce.
Image: ECDoT
UMpathiswa weSebe lezoThutho noKhuseleko eMpuma Koloni, uXolile Nqatha, udlulisa amazwi ovelwano kwiintsapho zamalungu asixhenxe abhubhe kwingozi eyenzeke kusasa ngoLwesithathu kuN2 kufutshane nesikhululo seenqwelomoya iBulembu Airport eQonce.
Ngokwengxelo yesithethi seSebe, u-Unathi Binqose, ithi le ngozi yenzeke phakathi kweemoto ezintathu. Ibhaki eluhlobo lweToyota Hilux, nebilayishe abantu abahlanu kuyo, iye yayokugila imoto iMercedes-Benz emveni koko yantlitheka kwibhaki eluhlobo lweNissan Navara.
UBinqose uthi abahlanu abantu kwiToyota Hilux baswelekele kwindawo yexhwayelo kukho noselula ngokweminyaka. KwiNissan Navara kubhubhe ababini, nabo babhubhela kwindawo yexhwayelo. Iqhuba ithi kwiMercedes Benz basindile ababebabini nabafumana unyango lemikrwelo kwisibhedlele iGrey eBhisho.
UNqatha uthi ibadandathekisile le ngozi . Uthi ukungathobeli mithetho yendlela nokungabikho kwenkathalo kubasebenzisi bezithuthi kubangela iingozi ezinje ngezi.
Ukwahlabe ikhwelo kuluntu esithi maluhlale luthe qwa ezindlelni lube nomonde ukunqanda iingozi ezinokunqandeka ezindleleni. ISebe lilisana neentsapho likwadlulisa umyalezo kubaxhoba afumana unyango esibhedlele.
Ityala lokubulala ngokungenanjongo livuliwe kwaye uphando ngokoyamene nale ngozi luyaqhuba.