Kuchithwe amatyotyombe abazimela kuwo abophul'umthetho eQuigney
Abasemagunyeni besenza ugqogqo bekwadiliza namatyotyombe akhiwe ngetshova ngabo kukholelwa ukuba bophula umthetho eQuigney.
Image: Buffalo Insider
Indawo yaseQuigney yenye yeendawo ezinomtsalane eMonti kubakhenkethi abaphuma kwezinye iidolophu zaseMpuma Koloni nabaphuma kumanye amaPhondo kuquka namazwe.
IQuigney Forum ibambisene namaPolisa kwanabagunyazisa umthetho eBuffalo City Metro Municipality (BCCM) bakwiphulo lokulwa ukungcoliseka kwale ndawo kwanembonakalo embi eQuigney ibuyele kwisidima sayo kwanesimo esihle eyayisaziwa ngayo.
Amagosa aseBuffalo City Metro Municipality kwakunye neQuigney Forum elungiselela ukuya kumatyotyombe akhiwe ngetshova ngabo kukholelwa ukuba babandakanyeka kwizenzo zolwaphulomthetho eQuigney.
Image: Quigney Forum
NgoMvulo kule veki eli qela lichithe amatyotyombe aqikelelwa ngapha kwamashumi amabini anesihlanu (25) ngokokutsho kobeyinxalenye nakhiwe ngenkani kwihlathi eliseQuigney.
Ngokwengxelo yeQuigney Forum, ithi aba bantu bokhe ngenkani nangokungekho semthethweni la matyotyombe, ikholelwa ukuba ngokwenza esi senzo kukungcolisa indawo yaseQuigney kuba akuvumelekanga matyotyombe kwela hlathi.
Elinye le khaya lomgunyathi elenziwe ngabo kukholelwa ukuba babandakanyeka kulwaphulomthetho olwenzeka eQuigney
Image: Buffalo Insider
Aba bokhe kule ndawo kukholelwa ukuba ikwangabo abenza ulwaphulomthetho eQuigney bakugqiba babalekele kweli hlathi. Okunye okuvelileyo kukuba bakwabandakanyeka nakumkhwa othe gqolo wokubiwa kweentambo zombane.
Olu tyelelo kula matyotyombe akweli hlathi ayilotyeli lokuqala lisenziwa, nakunyaka ophelileyo belwenziwe ugqogqo yiQuigney Forum ukuzama nokulwa ulwaphulomthetho.