Kubanjwe amaxhego amabini enemipu engekho mthethweni eMthatha
Kubanjwe amaxhego amabini eNcise eMthatha.
Image: SAPS
Kulindeleke kuba avele phambi koMantyi waseMthatha kule veki amaxhego amabini aseGaduka, eNcise nabanjelwe ukuba nemipu engekho semthethweni, engenalayisenisi ngamanye.
La maxhego abanjwe ngoLwesihlanu wempelaveki esiphuma kuyo liqela lamaPolisa akwicandelo lokulwa ukubiwa kwemfuyo.
Le mipu ibhaqwe ineembumbulu ngaphakathi. Ngokweminyaka ubudala yala maxhego aphakathi kweminyaka engamashumi amathandathu anesixhenxe (67) ukuya kumashumi asixhenxe anesine (74).
Ngokwengxelo yesithethi samaPolisa aseOR Tambo uCaptain Welile Matyolo, ithi umpu womrhanelwa (74) ubhaqwe egumbini lakhe lokulala xa amaPolisa ebesenza ugqogqa wabe uneembumbulu zine ngaphakathi kuwo wabe ungenayo ilayisenisi.
Ingxelo iqhuba ithi owesibini umrhanelwa (67) kufunyenwe kuye umpu oluhlobo lweNoricho uneembumbulu ezintandathu ngaphakathi. Esi sibini siye sabanjwa savalelwa. Sijongene netyala lokuba nemipu engenalayisensi kwanokuba neembumbulu kubo.
UBrigadier Vukile Ntuli uliqwhabele izandla eli qela ngokuzinikela kwanokuzimisela kumsebenzi walo wokulwa ulwaphulomthetho oko laqalisa eli phulo.