IMonti iphakathi kweedolophu zaseMzantsi Afrika eziza kuthiywa ngokutsha
IMonti iza kutshintshwa igama kungekudala.
Image: Facebook
IMonti iza kutshintshwa ngokusemthethweni igama layo ibe yiKuGompo City, ngelixa iRhafu iza kuba yiRobert Sobukwe Town, emva kokuvunywa kotshintsho lwamagama eendawo ezingamashumi amabini ananye nguMphathiswa wezeMidlalo, ubuGcisa neNkcubeko uGayton McKenzie.
Olu tshintsho, olubandakanya amaphondo aliqela nekuza emva kweengxoxo zikawonkewonke kuzwelonke, kulindeleke ukuba lupapashwe kwiiveki ezizayo.
Usihlalo weBhunga laMagama eeNdawo zaseMzantsi Afrika (SAGNC) uJohnny Mohlala uqinisekisile ukuba uMphathiswa utyikitye amagama avunyiweyo.
“UMphathiswa uwatyikityile amagama, kodwa kusafuneka apapashwe,” utshilo uMohlala exelela iphephandaba iDaily Dispatch kutshanje.
IEconomic Freedom Fighters (EFF) eMpuma Koloni iyamkele into yokutshintshwa kwegama laseMonti kunye nezinye iidolophu, ichaza le nto njengenyathelo eliyimfuneko ekulungiseni imbali yobukoloniyali eMzantsi Afrika.
Iqela lithi utshintsho bekudala ludingeka.
“iEFF eMpuma Koloni iyaqaphela kwaye iyakwamkela ukutshintshwa kwamagama eedolophu ezifana ne-East London, eyaziwa ngokuba yiMonti, ibe ligama elicetywayo elithi KuGompo City, kunye nokutshintshwa kwamagama ezinye iidolophu ezikwiphondo,” itshilo iEFF kwingxelo.
Iqela lithe amagama amaninzi eedolophu asabonakalisa ingcinezelo yobukoloniyali endaweni yobuni nembali yoluntu lwaseAfrika.
Eli qela lezopolitiko lithe la magama eendawo awakhethi cala, kwaye anentsingiselo nenkumbulo.
“Ukuqhubeka nokuhlala, ukufunda nokusebenza kwiindawo ezibizwa ngamagama abacinezeli bamakoloniyali kuqinisa imbali ebuhlungu yokubekelwa ngaphandle kwaye kunciphisa isidima sabantu baseAfrika.”
Ngelixa bexhasa inkqubo yokutshintsha amagama, iEFF igxininise ukuba utshintsho kufuneka luhambisane nophuculo olubonakalayo kubomi babantu.
“Ukutshintsha amagama eedolophu kukodwa akuyi kusombulula intswelangqesho, ubuhlwempu, ukungalingani nokunikezelwa kweenkonzo kakubi,” litshilo iqela.
“Kufuneka kube yinxalenye yenkqubo ebanzi yenkululeko yezoqoqosho, ukubuyiselwa komhlaba nobulungisa bentlalo.”
iEFF yongeze ngelithi ixhasa ukubandakanyeka koluntu kwiinkqubo zokutshintsha amagama kwaye yawakhaba amabango okuba olu tshintsho lujoliswe ekwahlukaniseni uluntu.
“Ukutshintsha amagama akwenzelwanga ukwahlula abantu okanye ukucima imbali yomntu. Kumalunga nokulungisa ukungabikho kobulungisa kwangaphambili nokuqinisekisa ukuba wonke umntu, ingakumbi uninzi lwabantu baseAfrika, uziva eqatshelwa kwaye ehlonitshwa,” itshilo.