Iinzame zokulwa ukusetyenziswa kweziyobisi ezikolweni eDuncan Village
Iphulo lokulwa iziyobisi eDuncan Village.
Image: Uthunyelwe
Iziyobisi kwanamaqela emigulukudu anawo namagama azibiza ngawo yiyona ngxaki kwanomngeni ojongene nezikolo ezisezilokishini.
Oku kubangele ukuba kushukume inkampani yabucala, iTyekana Protection Services, neye yakhweba amaPolisa, kwakunye nabomthetho eBCMM ekubeni kuhlangulwe abafundi ezikolweni kusengethuba.
Ummandla waseDuncan Village yenye yeendawo egutyungelwe yintswelangqesho kulutsha nekwagutyungelwe kukusetyenziswa kweziyobisi ekuhaleni. Umsitho uza kubanjelwa khona kusasa ngomso uLwesihlanu kwisitalato iJabavu eDuncan Village.
UCeba wakwaWadi 7, uClara Yekiso-Morolong, uthi eli nyathelo lakuthi lixhobise nabafundi benze isigqibo esilungileyo nesakuthi sakhe ubomi babo bubengcono kwaye nekamva liqhakaze.
UYekiso-Morolong ukwabongoza nabazali noluntu ekuhlaleni ekubeni luthabathe inxaxheba kumanyathelo anje alwa ukusetyenziswa gwenxa kweziyobisi.
"Ngokusebenzisana sonke singawenza umohluko kwaye siqinisekise nokuba ulutsha lwethu lufumana amathuba abawafaneleyo," utshilo uYekiso-Morolong.
Umnikazi weTyekana Protection Services uMlindelwa 'Man B' Tyekana.
Image: ABONGILE GINYA / I'SOLEZWE LESIXHOSA
Umsunguli weTyekana Protection Services owaziwa ngelikaMlindelwa 'Man B' Tyekana, uthi ibekukunyuka kwezinga lokusetyenziswa kweziyobisi ngaphakathi ezikolweni okumenze ukuba ashukume.
"Bekukade kukho ixesha apho besijongene nento yokusetyenziswa kweziyobisi kwanomkhwa wamaqela emigulukudu, kodwa ngoku lonyukile izinga kuba abafundi bathengisela abanye ngaphakathi esikolweni. Oku kusetyenziswa kweziyobisi ezikolweni kunomthelela ombi kakhulu kuba abanye baphela beyeka esikolweni bangaboni isidingo sokuqhubekeka nokufunda kuba sele beqhuba nokwenza imali le bayifundelayo," utshilo uTyekana.
Uqhube wathi oku kukwabeka ubomi bootitshala kwanabanye abafundi abangenanto yakwenza neziyobisi ebungozini.
Isithethi samaPolisa kummandla waseBCMM, uCaptain Hazel Mqala, uwamkele ngezandla ezishushu eli nyathelo esithi ngenene lakuncedisa ekulweni ukusetyenziswa gwenxa kuluntu ekuhlaleni.
"Ndibongoza uluntu lwethu ekuhlaleni luxhase eli nyathelo ukuze nabasele begaxeleke kwiziyobisi babuqonde ubungozi bokusebenzisa gwenxa iziyobisi," utshilo uMqala.