Silibona inyathelo likaSirayeli njengento ebonakalisa ukungahlonipho imigaqo, utsho uMabuyane

INkulubaphathiswa yaseMpuma Koloni uOscar Mabuyane ugxeke iziko lozakuzo lakwaSirayeli ngokungalandeli imigaqo elawula indlela yokuziphatha kwamagosa xa ephuma kwelinye ilizwe.

Amagosa aphuma kwiziko lozakuzo lakwaSirayeli atyelele iKumkani yabaThembu uBuyelekhaya Dalindyebo, aze atyelela namaziko ezempilo neWalter Sisulu University (WSU) eMthatha. Olu tyelelo lilandela utyelelo lukaDalindyebo kwilizwe lakwaSirayeli kunyaka esiphuma kuwo u2025 nalapho wathi wavakalisa inkxaso yelizwe lakwaSirayeli elithe gqolo ukuhlasela ilizwe lasePalestina elimelene nalo.

UDalindyebo ukwathe uyahambisana nezimvo zoMongameli waseMelika, uDonald Trump, wagxeka uMongameli uCyril Ramaposa ngokutyeshela ubuhlobo kwakunye namazwe aseNtshona.

UMabuyane uthi la magosa bekungafanele ukuba atyelele amaziko ezempilo, kwaneWSU engabikanga kumaSebe karhulumente alawula la maziko. Ukwathe isivumelwano esenziwe ngala magosa egameni lelizwe lakwaSirayeli, kwakunye neKumkani yabaThembu sijoliswe ekujongeleni phantsi urhulumente olawulayo kweli loMzantsi Afrika.

UMabuyane uthe: "Iingxoxo nezivumelwano ezingentsebenziswano namanye amazwe zenziwa neSebe lobudlelwane namanye amazwe, ibandakanye iSebe lezemali, ubukumkani abungeni ndawo. Silibona inyathelo likaSirayeli njengento ebonakalisa ukungahlonipho imigaqo equka amanye amazwe," utshilo uMabuyane.

Uyalele uMphathiswa wezeMpilo eMpuma Koloni, uNtandokazi Capa, ukuba aphande amagosa ela Sebe athe amkela umnikelo wakwaSirayeli.