Kuvezwe ubungqina obutsha wabuyiselwa ezinkundleni umrhanelwa waseBityi

Ushiyeke ngaphakathi eziseleni umrhanelwa onguAthenkosi Sandlana (27)  waseMatheko, eQunu, eMthatha, nobevele phambi koMantyi waseBityi ngoMvulo ngetyala ajongene nalo lokubulala indoda (38) kweyeNkanga ka2023.

Ingxelo ithi abecuphi bommandla waseOR Tambo baye babuyela kwakhona kweli tyala bephonononga idokethe befuna ubungqina obutsha emva kokuba iNkundla ingazange ifune ukutshutshisa umrhanelwa.

Ngokwengxelo yesithethi samaPolisa, uCaptain Welile Matyolo, ithi ixhoba (38) lelelali enye nomrhanelwa nabaxabana kwindawo yentselo kungomhla wamashumi amabini anesithandathu (26) kweyeNkanga ka2023 kusemva kwemini. Ingxelo iqhuba ithi ebusuku kwangalo mini yengxabano ixhoba lilele kowalo lahlaselwa ngesitulo sentsimbi nguSandlana lonzakala. 

UMatyolo uthi ixhoba labalekiselwa esibhedlele nekulapho labhubhela khona. Ityala lokubulala laye lavulwa, iNPA ayafuna ukulitshutshisa ityala isithi akukho bungqina buphelelyo de kwabe kungenelela iqela labecuphi besithili saseOR Tambo abaye beza nobungqina obupheleleyo. USandlana uye wabanjwa ngomhla weshumi elinesihlanu (15) kule nyanga wavela ngosuku olulandelayo ze lamiselwa uMvulo umhla wamashumi amabini anesithandathu (26).

UMajor General Norman Modishana uqhwabele izandla abecuphi baseOR Tambo ngezakhono zabo ezigqwesileyo zokuphanda kwanokubuyisela ezinkundleni idokethe ebibekelwe bucala wabe yena umrhanelwa epholile ezitalatweni zaseQunu.

Umrhanelwa uza kubuyela ngomhla wesine kwiveki ezayo apho aza kube efaka isicelo sebheyile.