Ingqina linike ubungqina obothusayo ngokubulawa kukaMagaqa
USindiso Magaqa wabulawa ngo2017.
Image: Umfanekiso ogciniweyo
IKomishini kaMadlanga ive ukuba ukubulawa kowayenguNobhala weANC Youth League (ANCYL), uSindiso Magaqa, kwakunokuthintelwa emva kokuba ingqina (Witness E) lithe amadoda amdubulayo [uMagaqa] alixelele kwangaphambili ukuba aqeshelwe ukubulala uMagaqa kodwa wasilela ukuphendula ukuba kutheni engenzanga nto.
Enikela ubungqina kwiKomishini ngoMvulo, uWitness E uthe ufumene ulwazi ngqo olusuka kubadubuli waza wagxininisa ukuba “ayisiyonto ihamba ithethwa”.
“Abadubuli ngabo abandixelele ukuba siqeshelwe ukubulala uSindiso Magaqa,” utshilo.
Nangona ezichaza njengegosa lezobuntlola elisebenza kakuhle, uWitness E uvumile ukuba akazange athathe amanyathelo.
Ubange ngelithi unezinga lempumelelo eliqinisekisiweyo ekuncedeni kwiinzame zokulwa nolwaphulomthetho, esithi abarhanelwa awayebachongile basentolongweni okanye babhubhile.
UMagaqa, 35, nabanye ooceba ababini badutyulwe nge13 kweyeKhala ka2017 ngaphandle kwevenkile yokuthengisa impahla emva kwentlanganiso yebhunga kumazantsi eKwaZulu-Natal.
Wasweleka emva kweeveki, ngomhla wesine kweyoMsintsi.
KweyeKhala ka2025, owayeqeshelwe ukubulala uSbusiso Ncengwa wagwetywa iminyaka engamashumi amabini anesihlanu entolongweni ngokubulala.
USihlalo weKomishini uJaji uMbuyiseli Madlanga uxine eli ngqina, uWitness E, ngemibuzo ngenxa yokusilela okucacileyo ukuthintela ukubulawa kukaMagaqa.
UMadlanga ubuze ukuba ngaba abadubuli bawabiza na amagama abantu abaza kubanceda.
Ingqina liphendule lathi “ewe”, lingqina ukuba abo batyholwa ngokuba ngoongqondongqondo abaxelwa ngabadubuli yayingabaphathi bakhe.
Ingqina livumelene neKomishini ukuba ukubulawa ngekwakuthintelwe ukuba bekuthathwe amanyathelo kwangoko lifumana isilumkiso.
Nangona kunjalo, walile ukuchaza amagama, ecaphula ukoyikisela ukhuseleko nomsebenzi wakhe.
Ubungqina buvele emva kokuvela koMphathiswa wamaPolisa uSenzo Mchunu phambi kweKomishini kutshanje, apho wakhanyela ukwenza ubugwenxa waza wala izityholo zokungenelela kwezopolitiko kuphando lwamapolisa.