AbakwaLepas bafikile neyabo eyaseChina
Iimoto zakwaLepas ziza kufumaneka ngoku eMzantsi Afrika.
Image: Chery South Africa
ULepas, ophantsi kweChery Group, wazisa ngokugaleleka kwabo eMzantsi Afrika. Ngobumbo olufaniswa nesilwanyana ingwe, iimoto ezintathu eziluhlobo lweSUV zakwaLepas zingxindilili, zinesidima, ziphinde zibukeke zintle mpela endleleni. Abaqhubi baseMzantsi Afrika abazithandela ukhetheko, ukucweleka, nokuphala, ezakwaLepas zithembisa ukuphaka konke oku nangakumbi.
EzakwaLepas abazibiza iL4, L6, neL8, ziza kufumaneka ingekafiki inyanga yoKwindla kulo nyaka ka2026.
Isaziso sokufika kweLepas eMzantsi Afrika besingumsitho othe xaxa eRhawutini ekupheleni kwale nyanga idlulileyo. Ibingoosaziwayo bakumabonakude, oosaziwayo kumakhasi onxibelelwano, ababhali, iintatheli, nabo bazokuzithengisa.
Sifumene ithutyana lokuzibuka sizivele ukuba zivakala njani ngaphakathi, sakwazi nokucofacofa sibone ukuba zisiphathele ntoni okutsha.
Okona bekuthembisa kukuba izikhulu zeli shishini leemoto beziphumile zisuka ngqo eChina, okusixelela ukuba bazokugxininisa ngobukho babo apha kweli, ayingo "ngena-phuma" – baze unomphelo.
Ubungcali, amandla, nokuphephisa ziintsika abazingca ngazo kwaChery Group, neLepas ke izoqhubeka njalo.
Ukuba ukrokrela ukufana phakathi kwezi SUV iL4, L6 neL8 zakwaLepas nezo esiziqhelileyo zakwaChery, kukuba iChery Group sebeziincutshe kubunjineli, kuyilo, nophuculo kwiinqwelo zabo, okunika uthembeko kwezi zifikayo zakwaLepas.
Yonke ingcaciso yemoto yeLepas yenziwe ngononophelo olukhulu, ukusukela kwimigca eyilwe ngobugcisa ebonakalisa ukuzithemba nokuhamba, ukuya kubuchwepheshe obuqondayo obuphucula amava okuqhuba.
Ngokusekelwe kwiDNA yengwe, iimoto zeLepas zidibanisa isantya, imvelo yokuziphatha, namandla nobuhle – zibonelela ngamava okuqhuba avuyisayo kwangaxeshanye aphucukileyo.
ILepas ayisiyomoto nje kuphela, yindlela yokubonakalisa ubuntu, isimilo, kunye nokuphucuka. Ngokudibanisa ubungqongqo bobuchwepheshe beqela lakwaChery nokuqonda nzulu kobuhle kuyilo, iimoto zeLepas zibeka umgangatho omtsha kushishino lweemoto eMzantsi Afrika.
Ngeendidi ezilindelwe ngolangazelelo, iL4, L6, neL8 zilungiselelwe ukungena ezindleleni ukusukela kwikota yokuqala neyesibini ka2026, abaqhubi baseMzantsi Afrika banokulindela ixesha elitsha lesitayile, ukuzithemba, nenkuthazo emva kweempondo zokuqhuba.