Kubhubhe abantu abathathu, konzakala abahlanu kwingozi eyenzeke eXesi
Kubhubhe abantu abathathu konzakala abahlanu kwingozi eyenzeke kuR63.
Image: ECDoT
Ngabantu abathathu ababhubhe kwangoko kwingozi eyenzeke kwindlela uR63 ngaseDebe Nek ekuphumeni kwaseQonce, ze abahlanu bafumana umonzakalo nababalekiselwe esibhedlele.
Le ngozi yenzeke ngoLwesibini kule veki ngezithuba zentsimbi yesine emveni kwemini.
Ngokwengxelo ephuma kwisithethi seSebe lezoThutho noKhuseleko eMpuma Koloni, u-Unathi Binqose, ithi le ngozi yenzeke phakathi kweemoto ezimbini – iibhaki – nebezihamba indlela enye.
Ibhaki ethwala imali yakwaFidelity ibinoonogada ababini nebisuka eXesi. Eyesibini ibhaki nebilayishe abantu abathathu ngasemva ilayishe imfuyo ephilayo nayo ibisuka ngaseXesi.
Ingxelo iqhuba ithi abathathu ababekwibhaki ebilayishe imfuyo baye babhubha kwindawo leyo yexhwayelo.
UBinqose uthi bekukho neToyota Corolla ekuye konzakala abantu nabasesibhedlele nabo befumana unyango.
Amaxhoba ebekwimoto yakwaFidelity nakwiToyota Corolla aseGrey Hospital eQonce.
Ityala livuliwe kwisikhululo samaPolisa eChungwa kwaye kuyaphandwa ngabasemagunyeni.