Bemke namagwinya abarhanelwa bakungayifumani imali eMqanduli

Babanjiwe abarhanelwa ababini, bebanjwa ngamaPolisa aseCoffe Bay, eMqanduli, emva kokuba bethe baxhomisa imoto ethuthela iivenkile isonka.

Ingxelo yesithethi samaPolisa alammandla, uCaptain Welile Matyolo, ithi ngoLwesithathu kule veki emveni kwemini kwilali yakwaQhogi kwaNenga - umqhubi kwakunye nomncedisi wakhe bamiswe ngamadoda amabini xa beza kuwela ubhulorho bakhonjwa ngompu.

Ekumiseni kwabo, abarhnaelwa bafune imali. Bathe bakungayifumani, baye boxutha isonka namagwinya baze bemka emva koko.

UMatyolo uthi umqhubi uye wasebenzisa ifowuni yakhe ecela amaPolisa aye akhawuleza abongoza intsebenziswano ebahlalini bendawo. Ngokukhawuleza, baye bavingcelwa ngabahlali abarhanelwa baze babanjwa bavalelwa entolongweni.

Kumrhanelwa onamashumi amathathu eminyaka ubudala ufunyenwe enompu oneembumbulu ezintlanu ngaphakathi ongenazo iimpephamvume.

Abarhanelwa babekwe ityala lokuphanga kwanelokuba nompu ongenazimpepha. Kulindeleke bavele phambi koMantyi eMqanduli ingaphelanga le veki.

UMajor General Norman Modishana uwuncomile umsebenzi omhle owenziwe ngabahlali owokuzama ukuncedisa kwidabi lokulwa ulwaphulomthetho ezilalini.