Gade: ‘Akufundelwa ukupasa, kufundelwa ulwazi’
UMphathiswa wezeMfundo uFundile Gade kwakunye neNtloko yeSebe lezeMfundo eMpuma Koloni uSharon Maasdorp ngethuba kupapashwa iziphumo zeemviwo zikaGrade12 eICC eMonti.
Image: Abongile Ginya / I'solezwe lesiXhosa
UMphathiswa wezeMfundo eMpuma Koloni, uFundile Gade, uthi bayazamkela iziphumo nangona zehle ngomyinge ongu-0.8%. OkaGade uxelele iintatheli ukuba iziphumo zeMatriki ayisinto engamanani afunyenwe liphondo, koko zingomgangatho wemfundo.
"Siphumile kwinto yokufundela ukupasa, ngoku sifundela ulwazi. Kufundelwa nokusombulula imicelimngeni ekumakhaya abaphuma kuwo abafundi. Sikwiphondo elinemicelimngeni edinga ukusonjululwa," utshilo uGade obephahlwe ngamagosa aphezulu esebe leZemfundo kwindibano ebiseMonti.
Uthe beliSebe bebenomcelimngeni weempuphuma ezasuba imiphefumlo engapha kwekhulu eMthatha ezachaphazela nezikolo ezingaphaya kwekhulu ngomhla weshumi (10) kwinyanga yeSilimela ka2025.
Okunye okukhankanywe nguGade, okungunobangela [weli nani elihlileyo], ibe luqhankqalazo loonoteksi kwakunye nokunqunyanyiswa kweetitshala ezityholwa ngokuxhaphaza abafundi ngokwesondo. Inkqubo yokuwongwa kwabafundi abagqwesileyo eMpuma Koloni iqhutywe emva kwemini.