'Silahlekisiwe' – kutsho abathunyelwa phesheya bethenjiswa imisebenzi

Abemi boMzantsi Afrika abalishumi elinesine (14) ababevalelwe eThailand kulindeleke ukuba babuyiselwe eMzantsi Afrika kwiintsuku ezizayo emva kokuba beqokelelwe ukuya kusebenza phesheya kolwandle kwaye le misebenzi ebeyihambele ayizange iphumelele njengoko babethenjisiwe.

Aba bantu kuthiwa batsalwa ngumntu ofunela abantu imisebenzi othe wabafunela umsebenzi kwicandelo lezobuchwephesha phambi kokuba baye eThailand. Iintsapho zabavalelweyo zithi amalungiselelo engqesho ajike ahluka kakhulu kulawo ayexelwe kubo ngaphambili.

Esinye isizalwane, esithethe egameni lelungu losapho elivalelweyo, sixelele iSABC ukuba eli qela lithintelwe ukuba linxibelelane nabantu abangaphandle kweThailand futhi ligcinwe phantsi kweemeko ezingentle, eziquka izisele ezixineneyo, ukufikelela okulinganiselweyo kwiziseko zococeko kunye nolwazi oluncinci ngemicimbi yezomthetho.

Kuthiwa uChrispin Phiri, isithethi seSebe lezoBudlelwane baMazwe ngaMazwe neNtsebenziswano, uthe indlu yozakuzo yaseMzantsi Afrika eBangkok ibisoloko inxibelelana nabasemagunyeni baseThailand kwaye inike inkxaso ngokuhambelana nezikhokelo zamazwe ngamazwe.

Wongeze ngelithi isebe liyancedisa ngamaxwebhu okuhamba kwaye lisebenzisana nabasemagunyeni eMzantsi Afrika ngaphambi kokubuya kweqela.

Isebe likwalumkise abantu abafuna umsebenzi ukuba baqinisekise ngemvelaphi yabantu abafunela abantu imisebenzi kunye nemiqathango yezivumelwano zengqesho phambi kokuba baye kumazwe aphesheya, lisithi izithembiso zemisebenzi ezilahlekisayo zisaqhubeka nokubeka abemi boMzantsi Afrika emngciphekweni.