ULamola ugxeka iMelika ngezenzo zayo eVenezuela
UMphathiswa wezoBudlelwane baMazwe ngaMazwe eMzantsi Afrika, uRonald Lamola, ugxeke iMelika ngezenzo zayo zakutshanje kwilizwe laseVenezuela.
Image: Umfanekiso ogciniweyo
UMphathiswa wezoBudlelwane baMazwe ngaMazwe, uRonald Lamola, ugxeke izenzo zeMelika eVenezuela, esithi ziwujongela phantsi umthetho wamazwe ngamazwe nemigaqo yokuzimela kweVenezuela njengoko kuchazwe kwisivumelwano seZizwe eziManyeneyo (UN).
“Singurhulumente woMzantsi Afrika, sakhwankqiswa zizenzo zeMelika kuba ziphula isivumelwano seUN.
“Kukwaphula umthetho wobuzwe baseVenezuela, futhi kukwaphula yonke imigaqo efanele ilawule ukuhlonelwa kwamazwe azimeleyo,” utshilo uLamola.
Uthethe noonondaba ngoMvulo phambi kwentlanganiso yeBhunga loKhuseleko leZizwe eziManyeneyo eyenzeke kwangolo suku lunye, esithi uMzantsi Afrika unethemba “ngezigqibo ezinenkqubela” kunye “nothethathethwano oluneziphumo” ngalo mba.
Umphathiswa ubalule imiba ebanzi yengingqi ekuxoxwa ngayo kwintlanganiso yekomitana yezobudlelwane bamazwe ngamazwe yeANC (International Relations Subcommittee).
Kubekho uxinzelelo lwexesha elide yiMelika kurhulumente kaMongameli waseVenezuela uNicolás Maduro.
IMelika ifuna ukutshutshisa uMaduro namanye amagosa aphezulu ngezityholo zokuthubelezisa iziyobisi norhwaphilizo futhi ibonelele ngembuyekezo ngolwazi olukhokelela ekubanjweni kwabo.
Ilizwe laseMelika lithe la manyathelo ajolise ekulweni nezenzo zolwaphulomthetho nokuxhasa imigangatho yentando yesininzi eVenezuela.
“Kubalulekile kuthi sonke ukuba sime ngakwicala lomthetho kwihlabathi jikelele simanyene,” utshilo uLamola.