Ubanjwe eFreyistata omnye wabarhanelwa ababulale inkosikazi ebinguMtshutshisi eGqeberha
Kubanjwe umrhanelwa wesithathu kwityala lokubulala umtshutshisi waseGqeberha obhinqileyo.
Image: Umfanekiso ogciniweyo
Umrhanelwa wesithathu ogama linguThamsanqa Mthembu (33), nongomnye wabarhanelwa abajongene netyala lokudubula babulale ngokungenalusini inkosikazi yaseGqeberha ebinguMtshutshisi, ushiyeke ngaphakathi eziseleni elinde inyanga yoKwindla kunyaka ozayo.
UMthembu ubanjwe ngooKhetshe kuhola wendlela uN1 eBloemfontein ngorhatya lomhla wamashumi amabini kule nyanga.
UMthembu wongeze inani labarhanelwa ababini abangaphakathi eziseleni nababanjwa kwiinyanga ezimbini ezidlulileyo.
Le nkosikazi, egama linguTracy Brown (42), yadutyulwa kude kufuphi nekhaya layo isemotweni.
Isithethi sooKhetshe eMpuma Koloni, uWarrant Officer Ndiphiwe Mhlakuvana, uthi umrhanelwa ubanjwe eneefowuni ezintathu kuye ezithinjwe ukuba zincedise kuphando.
UMhlakuvana uthi kukwafunyaniswe ukuba unalo nelinye ityala kwisikhululo saKwazakhele elokuzama ukubulala.
Obambele njengeNtloko kooKhetshe eMpuma Koloni, uBrigadier Venessa Shantelle Hastings uncome intsebenziswano ukuze kubanjwe umrhanelwa wesithathu.
UHastings ukwancome nomsebenzi eliwenzileyo eli qela.