UXolani Khumalo uza kufungiswa njengoceba weActionSA eKurhuleni
UXolani Khumalo uza kufungiswa njengoceba weActionSA eKurhuleni.
Image: Umfanekiso ogciniweyo
Umgqatswa weActionSA kwisikhundla sikaSodolophu Ekurhuleni, uXolani Khumalo, uza kufungiswa ngokusesikweni njengoceba kuMasipala oMbhaxa weSixeko saseKurhuleni namhlanje, ngoMvulo we10 kweyeNkanga 2025.
Ukuchongwa kukaKhumalo kuphawula isiganeko esibalulekileyo kwisicwangciso qhinga esibanzi seActionSA sokomeleza amandla olawulo kumasipala ombaxa phambi konyulo loorhulumente basemakhaya ngo2026.
Indima yakhe entsha iza kumnika ulwazi oluthe ngqo kwiinkqubo zikamasipala, imisebenzi, kunye nemingeni, inyathelo lo mbutho elikholelwa ukuba liya kunceda ukubeka isiseko sobunkokheli obusebenzayo nobunoxanduva.
NgokweActionSA, esi sikhundla siza kuphawula utshintsho lukaKhumalo ukusuka kubutshantliziyo ekuhlaleni ukuya kwinkokeli yezopolitiko esesikweni, simxhobisa ukuba akhonze ngcono abahlali baseKurhuleni kwaye aqhubele phambili nomsebenzi wombutho “wokulungisa isixeko.”
Umsitho wokufungiswa uza kuzinyaswa ziinkokeli ezininzi eziphezulu ze-ActionSA, eziquka uMongameli wombutho uHerman Mashaba, uSihlalo kazwelonke uMichael Beaumont, iSithethi sikazwelonke uLerato Ngobeni, kunye noSihlalo waseGauteng uFunzi Ngobeni.
Emva kweenkqubo ezisesikweni, igqiza lobunkokeli liza kuthetha noonondaba likunye noKhumalo, ibhunga laseKurhuleni, kunye nabameli bommandla.
Lo msitho ugxininisa ukuzinikela kweActionSA ekwakheni ubunkokeli obuqinileyo, obunamava koomasipala ababalulekileyo njengoko iqhubeka ukuzibeka njengombutho othembekileyo kwezopolitiko zaseMzantsi Afrika.
Kwinyanga ephelileyo, iActionSA ibhengeze uKhumalo njengomgqatswa wayo kwisikhundla sikaSodolophu kumasipala ombaxa waseKurhuleni phambi konyulo oluzayo loorhulumente basemakhaya.
Umongameli wombutho uMashaba wenze esi sibhengezo, esithi uKhumalo “yinkokeli enemigaqo yokuziphatha”.
“Inkokeli engoyikiyo, enemigaqo ezisesikweni, uKhumalo ukulungele ukuhlangula iEkurhuleni kubaphuli-mthetho, abonelele ngeenkonzo ezisisiseko nokuqinisekisa ukukhula nemisebenzi,” utshilo kwikhasi likaX.