Liqalile uhlolo lamakhwenkwe aza kuya eSuthwini!
UMphathiswa uZolile Williams.
Image: EC Cogta
Liqalile kule veki ngoMvulo uhlolo labantwana abangamakhwenkwe eziklinikhi ukulungiselela usuku lomhla we21 kule nyanga apho kuza kube kuqala ngokusesikweni isiko lolwaluko.
Urhulumennte waseMpuma Koloni uthi uzimisele kwaye uqule kangangoko ukuze kungabikho namnye umntwana olahlekelwa bubomi bakhe okanye bubudoda bakhe.
ISebe leNtsebenziswano kuRhulumento neMicimbi yeMveli (Cogta) lidize iinkcukacha ezithi liyaqala ngomhla weshumi elinesine (14) ulwaluko kwabo bangafundiyo.
Kwabo bafundayo basabhala iimviwo zokuphela konyaka liza kuqala ngomhla wamashumi amabini ananye (21) kweli phondo leMpuma Koloni.
IiNkosi, iingcibi kwakunye namakhankatha kwiMbizo elungiselela ulwaluko.
Image: EC Cogta
Eli Sebe likwadize ukuba sele liwulungele umsebenzi kwaye noqeqesho leengcibi namakhankatha sele luqhubela phambili kwizithili zonke zephondo leMpuma Koloni.
UMphathiswa weSebe, uZolile Williams, kwintetho yakhe uqale ngokunika amagqabantshintshi ngemingeni abakhwetha abajongene nayo ebandakanya ukwaluka phambi kwexesha, ukwalelwa amayeza ayimfuneko kunye nokwakhiwa kwamabhoma kwiindawo ezingafikelelekiyo.
UWilliams uthi ezi zinto ziqatshelwe njengegalelo elikhulu ekubulaweni kwabantu kwizikolo zolwaluko.
Oyingcali kwezakwaNtu, uGqirha Loyiso Nqevu, ethetha kwiMbizo yeSebe, eLusikisiki, ugxininise kubazali nakuluntu ngelithi luxanduva labo bonke abantu futhi kufanele wonke ubani abephakathi kweli siko ngoba ukungakhuseleki kwalo kuchaphazela wonke ubani.