Babini ababanjiweyo, omnye eneegusha ezibiwe eSulenkama!
Iigusha ezibiweyo ezifunyenwe ngamapolisa.
Image: SAPS
Babanjwe kwiidolophu ezahlukeneyo abarhanelwa ababini, omnye ebanjelwa ukubhaqwa eneegusha ezibiweyo, logama omnye ebanjelwa ukuba nompu ongenazimpepha zawo.
Aba barhanelwa babanjwe ngamaPolisa aseOR Tambo ngethuba esenza iphulo likaShanela ngoLwesibini kule veki.
Omnye umrhanelwa (28) ubanjwe kwilali iMaladini, eSulenkama, eneegusha ezilishumi elinesithathu (13) nodize ukuba uzibe kwilali yaseTsilithwa kuQumbu.
Umpu ongenaphepha othinjwe ngamapolisa.
Image: SAPS
Owesibini umrhanelwa (27) ubanjwe kwilokishi yaseNonyevu, eSajonisi
Ngokwengxelo kaCaptain Welile Matyolo, lo mpu ubhaqwe kumrhanelwa uthe xa ubuhlolwa inombolo yawo yavela eGoli.
Aba barhanelwa baseziseleni belindele usuku lwabo lokuvela phambi koMantyi waseNgqeleni naseSajonisi.