Ubanjwe ePitoli omnye wabarhanelwa ababhaqwa bezifihle kumzi othile kuQoboqobo

IiHawks zidize ingxelo yokuba ubanjiwe umrhanelwa wesithandathu ogama linguNkoketseng Koketso Pule (42) esongeza kwabahlanu abarhanelwa abaseziseleni eQonce nabajongene netyala lokuphanga imoto ethwala imali kweyeThupha wonyaka ophelileyo u2024.

UPule ubanjwe ngoLwesine kwiveki ephelileyo ngethuba egqiba kuvela phambi koMantyi wasePitoli kwiPhondo laseGauteng evela ngelinye ityala ajongene nalo.

UPule ukugcino eziseleni eQonce efikela kwatyholwa nabo, uBongani Mbuyisa (48), uSbusiso Mavuka (44), uDanielle Nefete (46), uPeter Mgunculu (58), kwakunye noBulela Irvin Didishe (43) nabasengaphakathi oko babebanjwe kunyaka ophelileyo.

Ngokwengxelo yesithethi seeHawks eMpuma Koloni, uWarrant Officer Ndimphiwe Mhlakuvana, ithi ukubanjwa kwesi sithandathu kuza emva kokuba ngomhla wama29 kweyeKhala wonyaka ophelileyo u2024, phambi kwentsimbi yesithandathu ekuseni kwindlela uN6 ngaseMacleantown phakathi kwedolophu yaseCumakala neMonti, kwaxhonyiswa imoto yakwaSBV ngaba barhanelwa.

Abarhanelwa baye babaleka nesixa semali esasingachazangwa, konzakala oonogada abathathu. Kwindawo leyo yesehlo kwabhaqwa neziqhushumbisi ezazisetyenziswa ngabarhanelwa.

Ingxelo kaMhlakuvana iqhuba ithi ulwazi lwaye lwavela lungaphelanga usuku apho abarhanelwa bafunyanwa kwindawo babecashe khona, kwilali yakwaTom kuQoboqobo.

AmaPolisa afika abarhanelwa bekwikhaya elirhanelekayo kwaTom, nalapho aye amkelwa ziimbumbulu edutyulwa ngabarhanelwa, aziphindezela amaPolisa kwabhubha abarhanelwa abahlanu.

Endlini eyayinabarhanelwa kwafunyanwa iingxowa ezintathu zemali, imipu yohlobo lweAK 47, omnye wohlobo lweR1 rifle, eminye yohlobo lweR5 rifles, iimagazini ezilishumi elinesixhenxe (17) zineembumbulu.

UMhlakuvana uthi kuphando obeluqhutywa lukhokelele iiHawks zaseMpum Koloni ziyokufika kwiPhondo laseGauteng nekuye kwabanjwa uPule.

UPule uza kuvela phambi koMantyi waseQonce kule veki.