Ubanjiwe utitshalakazi waseMonti othengisa ngamantombazana aselula ngesondo!
Utitshalakazi wesinye sezikolo zaseMonti obanjiweyo ezogqume ngexakatho nobeshishina ngabantwana abangamantombazana ngezesondo.
Image: Hawks
Uza kuvela phambi koMantyi waseMonti owasetyhini onamashumi amahlanu anesibini (52) ubudala ngokuzalwa ojongene nezityholo zokuxhwila kwanokushishinisa ngesondo ngabantwana abangamantombazana aphaphuma kwiidolophu eziphantsi kwendawo eyayifudula isaziwa njengeTranskei.
Ngokwengxelo yeeHawks zaseMpuma Koloni, ngokophando oluqale kweyoMsintsi ka2023, zithi, lo titshalakazi wesikolo saseMonti esingachazwanga, ebethe gqolo ukuthatha amantombazana asebatsha akuQumbu, Mthatha naseNgqeleni.
Isithethi seeHawks uWarrant Officer Ndimphiwe Mhlakuvana uthi, amaxhoba ebefika eMonti ahlale emzini walo titshalakazi nekulapho bekusenzeka khona olu shishino.
UMhlakuvana uthi amaxhoba ebethengwa ngemali ephakathi kweR250 ukuya kwiR300 ngobusuku.
Utitshalakazi uye wabanjwa emsebenzini wakhe ngentsasa yanamahlanje uLwesithathu. Ulindelekehe ukuba avele kusasa ngoLwesine phambi koMantyi eMonti.
Oyintloko kwiiHawks eMpuma Koloni, uMajor General Mboiki Obed Ngwenya, ulincomile eli nyathelo.