USibiya: 'Bendinobudlelwane obuhle noMkhwanazi'

USekela Mkomishinala wamaPolisa onqunyanyisiweyo uShadrack Sibiya udize iinkcukacha malunga nokungavisisani kwakhe noMkomishinala wamaPolisa eKZN uLt-Gen. uNhlanhla Mkhwanazi, uthi ubudlelwane babo obukade buqinile buchithekile emva kokubanjwa kwabarhanelwa kwityala lokubulala umrepha uAKA (Kiernan Forbes).

USibiya ebenika ubungqina phambi kwekomiti yethutyana yasePalamente ephanda urhwaphilizo kwiSAPS ngoMvulo.

Uthi ukungaboni ngasonye noMkhwanazi kwaqatsela emva kokuba abarhanelwa babanjwa baphoswa imibuzo ngokubulawa kwalo mrepha wodumo eThekwini.

"Yaqala apho ke ingxaki phakathi kwam noMkhwanazi, kwaye ibingafanelanga ukuba ibengumcimbi omkhulu," utshilo uSibiya.

USibiya uchaze ukuba ngethuba kuqhutywa iphulo elifihlakeleyo eKapa, ​​owayesakuba nguMphathiswa wamaPolisa ngelo xesha uBheki Cele waya kuye ukuze afumane inkcazelo ngokubanjwa kwaba bantu.

Ngethuba uMphathiswa ecela ukuba igqiza eliphandayo limhlaziye ngokuthe ngqo, uSibiya waqhagamshelana noSekela Mkomishinala wePhondo laseKZN endaweni kaMkhwanazi, ebalula ubunzima abenabo kwixesha elidlulileyo ekufikeleleni kuye.

"Ndandibuthembile ubudlelwane bethu," utshilo uSibiya.

"Kodwa ndathi xa ndithetha naye ekugqibeleni noMkomishinala wePhondo, waba nomsindo."

NgokukaSibiya, uMkhwanazi wamtyhola ngokutyeshela umthetho olandelwayo nokujongela phantsi igunya lakhe.

Okuthe kwalandela yaba yingxabano eshushu, nto leyo kutyholwa ukuba kwakhokelela ekubeni uMkhwanazi athintele uSibiya ukuba asebenze eKZN.

"Wandixelela ukuba, ‘Awunanto yakwenza neKZN ukusukela ngoku.’ Ndathintelwa ekubeni ndisebenza apho, kodwa ndiyintloko kazwelonke," utshilo uSibiya.

Ukunqunyanyiswa, utsho uSibiya, kuphazamise iinzame ezingundoqo zesipolisa ephondweni – eziquka ukulwa nokuphangwa okunyukayo kweemoto ezithutha imali, ukuthutyeleziswa kweziyobisi, izehlo zabantu abathengwayo ukubulala abantu, kunye nokutshiswa kweeloli.

"IKZN iyasokola. Iiprojekthi ezisuka kwikomkhulu ziyama kuba akukho ntsebenziswano," utshilo.

USibiya uyibethelele into yokuba ukungaboni ngasonye yayingeyonto elwa umntu kodwa sisiphumo sokungaqondani kunye neeyantlukwano zamagunya.

Uthe iinzame zokulungisa ubudlelwane obuqhawukileyo zibalulekile ekubuyiseleni amaphulo okulwa nolwaphulomthetho kweli phondo.

Kusenjalo, uSibiya utyholwa ngobuqhophololo nguMkhwanazi emapoliseni. UMkhwanazi uthe uSibiya usemva kokuchithwa kwePolitical Killings Task Team (PKTT).