Kubhiyozelwe ukubekwa kweNkosi yesizwe samaBhele eNgqushwa!
Iinkosi zaseMpuma Koloni ngethuba kubekwa uNkosi uKhawulela wamaBhele.
Image: Cogta
IBhunga leeNkosi eCisirha, eNgqushwa, yamkele ngokusesikweni uNkosi Mzikayise Welcome Khawulela njengeNkosi yesizwe samaBhele ngoLwesihlanu.
Lo msitho uqhutywe kanye ngale nyanga yamagugu namafa uqhutywa liSebe likaCOGTA. Nalapho abaphathiswa abaliqela bephondo laseMpuma Koloni bebeyinxalenye ukuyozimasa lo msitho kuquka noSekela Mphathiswa weSebe likaCOGTA kuzwelonke uNkosi Zolile Burns Ncamashe.
UNkosi uKhawulela wamaBhele eNgqushwa ongene esihlalweni ukusukela namhlanje uLwesihlanu.
Image: Cogta
Edlulisa umyalezo, uMphathiswa weMfundo eMpuma Koloni, uFundile Gade, nogxininise izinto ezintathu ngakuKhawulela athi zinokuthi zakhe isizwe, uthe kukubaluleka kolwimi, inkcubeko kwakunye nemfundo.
UNkosi Ncamashe uthe: "Ibende indlela, nangona kubenjalo silapha ngoku." Noqhubekeke esomeleza le Nkosi uKhawulela kwaye ekwamlumkisa nangombongo wombhali ongasekhoyo uMqhayi.
Obesothula intetho ngolu suku emele iNkulubaphathiswa yePhondo nonguMphathiswa weli Sele, uZolile Williams, nobethelele kwintetho yabaphathiswa abathethe phambi kwakhe esomeleza ekwachaphazela nemingeni ejongene nesizwe samaBhele.