UZuma neMK Party baza kusa iKomishoni kaMadlanga enkundleni

UMongameli weMK Party uJacob Zuma uza kuxoxa kwiNkundla ePhakamileyo yaseGauteng ePitoli namhlanje ngoLwesine ukuba iKomishoni kaMadlanga esandula ukusekwa iwagqithise ngokungekho mthethweni amagunya equmrhu lokongamela lenkundla laseMzantsi Afrika.

Kwisicelo esingxamisekileyo senkundla, uZuma kunye nombutho wakhe bafuna ukuthintela umsebenzi wale komishoni.

Bagxininisa ukuba abachasi ukusekwa kwekomishoni yophando ngokomgaqo, kodwa bayayichasa ngokukodwa le, ngenxa yesigunyaziso sayo kunye nokwakhiwa kwayo.

Eyona nto ibaxhalabisayo kukuba le komishoni, ekhokelwa yijaji yenkundla yoMgaqo-siseko uMbuyiseli Madlanga, inikwe uxanduva lokuphanda ngezityholo ezinobuzaza zezenzo zolwaphulomthetho kwingalo yomthetho.

Bathi oku kudala ukungqubana okucacileyo ekuphunyezweni komsebenzi.

“Eleenkundla alinakuba liziko elityholwayo kunye nequmrhu eliphandayo ngokusebenzisa elinye lamalungu alo,” utshilo uZuma kunye neMK Party kumaphepha enkundla.

Bathi oku kukwaphula umgaqo osemthethweni wokuba kungabikho mntu ufanele abe yijaji kwityala lakhe.

Babanga ukuba imiqathango yekomishoni iphazamisana namagunya awodwa omgaqo-siseko weKomishoni yeNkonzo yeeNkundlu (JSC) kunye neKomishoni yooMantyi, amaziko anikwe uxanduva lokujongana nokuziphatha kakubi kweenkundla.

Ukongeza kwinkcaso yabo, uZuma kunye neMK Party bakwasiphikisa isigqibo sikaMongameli Cyril Ramaphosa sokubeka uMphathiswa wamaPolisa uSenzo Mchunu kwikhefu elikhethekileyo kwaye onyule uNjingalwazi uFiroz Cachalia njengebambela.

Bathi, ezi zigqibo, azikho kumgaqo-siseko, azinangqiqo, kwaye zophula isifungo sikaMongameli.

UZuma kunye neMK Party bathi le komishoni “linyathelo elibiza kakhulu” elingenakufane libe neziphumo ezivakalayo.

Le komishini yabelwe uhlahlo lwabiwo-mali lweR147.9 million kwisithuba seenyanga ezintandathu.

Bakwathi ukugcina uMchunu ekhefini ixesha elide kuza kuba ngumthwalo ongeyomfuneko kubantu abahlawula irhafu.