UMkhwanazi ubandakanya amalungu ePalamente kulwaphulomthetho
UMkomishinala wamaPolisa eKZN, uLieutenant General Nhlanhla Mkhwanazi enika ubungqina bakhe ngezenzo zolwaphulomthetho kunye nokungenelela kwezopolitiko kumsebenzi wamapolisa.
Image: Oupa Mokoena/Independent Newspapers
Usuku lwesibini lweKomishoni kaMadlanga ludize ubungqina obukhwankqisayo boMkomishinala wamaPolisa eKZN, uLieutenant General Nhlanhla Mkhwanazi, otyhole amalungu amabini ePalamente ngokuphazamisana nomsebenzi wobuntlola bolwaphulomthetho, udize ukuba ubungqina obubalulekileyo awabungenisa kwiKomishoni kaZondo ngo2011 khange buhoywe.
UMkhwanazi ukhwele eqongeni kwaye akazange athintithe. Uchaze ilungu leDA uDianne Kohler Barnard kunye nenkokeli yeNCC uFadiel Adams njengoosopolitiki abatyholwa ngokuxhaphaza izikhundla zabo ukuze bangenelele kwimicimbi yezobuntlola.
Utyhole uBarnard ngokwaphula izivumelwano zomthetho kunye “nokukhuthaza uhlaselo kubuntlola,” nangona wayesazi ngokupheleleyo ukuba naziphi na iinkxalabo bekufanele ukuba ziye zadlula kwikomiti iJoint Standing Committee on Intelligence.
UMkhwanazi uthe lo mkhuba unyanzelise amagosa ezobuntlola eluntwini, nto leyo ebeka emngciphekweni wokuvezwa kweenkcukacha zombuso.
Ngokuphathelele noAdams, uMkhwanazi ubanga ukuba wafumana iinkcukacha zobuntlola zolwaphulomthetho ngaphandle kwemvume.
Kwisityhilelo esothusayo, uMkhwanazi uthe wafaka ingxelo efungelweyo eneenkcukacha kwiKomishoni kaZondo ngo2011, ngethuba esebenza njengeBambela likaMkomishinala kazwelonke kodwa akazange ahoywe.
Uthethe okufanayo ngokusetyenziswa kwempembelelo yezopolitiko nokusetyenziswa kakubi kwemibutho yobuntlola bolwaphulomthetho.
“Ngelishwa andizange ndimenywe ukuba ndinike ubungqina,” utshilo.
Ulumkise ngelithi ukusilela ekunyanzeliseni ulongamelo olufanelekileyo lobuntlola kukhokelela ekubeni abantu abangalawulekiyo badize ulwazi oluyimfihlo eluntwini, bejongela phantsi ukhuseleko lwelizwe kunye nokuthembeka kokuthotyelwa komthetho.