ICosatu igxeka uRamaphosa ngokuncoma oomasipala abaphantsi kweDA
UMongameli uCyril Ramaphosa ujongene nokugxekwa ngeentetho zakhe zakutshanje malunga noomasipala abaphantsi kweDA.
Image: Itumeleng English/Independent Newspaper
Umbutho wabasebenzi iCongress of South African Trade Unions (Cosatu) uyigxekile intetho kaMongameli uCyril Ramaphosa apho ebencoma oomasipala abaphantsi kweDemocratic Alliance (DA) eNtshona Koloni.
Kutshanje uRamaphosa uthe abanye oomasipala abaqhuba kakuhle kweli lizwe baphantsi kolawulo lweDA, nto leyo ebangele ukungoneliseki kwiANC namahlakani ayo.
Iinkokeli zeCosatu zithi amazwi alolu hlobo ajongela phantsi iANC namahlakani ayo, ingakumbi ngeli xesha apho imingeni yokuhanjiswa kweenkonzo kunye nokruthakruthwano lomanyano lugqugqisile kwezopolitiko.
“Ukhetho lweKapa neStellenbosch alufanelekanga. EKapa, xa ufika uze uqhube usiya esixekweni, kukho uN2 phaya, kwaye ubona ngasekhohlo ukuba kwenzeka ntoni. Sithetha ngantoni ke xa sithetha ngeKapa elilawulwa yiDA ngcono? Kuxa ufika esixekweni kuphela,” utshilo uSekela Mongameli wokuqala weCosatu uMike Shingange kudliwanondlebe neNewzroom Afrika.
“Lo nto ithetha ukuba iDA, ngokungafaniyo neANC, isebenzela abantu abambalwa beli lizwe.Kuthetha ukuba kwiDA, umsebenzi wayo kukugcina imeko yeKapa ecocekileyo nesele iphuhlisiwe kudala. Umyalelo weDA ayikokuphucula nokuphuhlisa iKhayelitsha nabo bonke oomasipala abangqonge isixeko saseKapa. Akulunganga ukuthelekisa umasipala waseTzaneen okanye eSoweto noomasipala abalawulwa yiDA. Ubukhulu becala iANC ilawula oomasipala abangathathi ntweni, abangakwaziyo ukuhlawula nokunyusa ingeniso.”
UShingange umile ngelithi akulunganga ukubongoza ooceba beANC ukuba bakhenkethe kwaye bafunde “kubantu abasebenzela iqaqobana.”
“SinguCosatu siyayigxeka loo nto. Sicinga ukuba ibingafanelekanga kwaye ndicinga ukuba singaba ngumzekelo ongcono wokuba singayiphucula njani indlela esilawula ngayo oomasipala bethu,” utshilo uShingange.