Abemi baseTshayina abasixhenxe bagwetyelwe ukuthubelezisa abantu eMzantsi Afrika
Bagwetywe iminyaka engamashumi amabini abemi baseTshayina abasixhenxe ngokuthubelezisa abantu eMzantsi Afrika.
Image: Hawks
INkundla ePhakamileyo yaseSouth Gauteng igwebe abemi baseTshayina abasixhenxe iminyaka engamashumi amabini entolongweni ngenxa yokuthubelezisa abantu, ukuxhwila kunye nokusebenzisa ngenkani, kuquka abantwana abangaphantsi kweminyaka elishumi elinesixhenxe.
Aba bemi baseTshayina baquka uKevin Tsao Shu-Uei, uChen Hui, uQin Li, uJiaqing Zhou, uMa Biao, uDai Junying kunye noZhang Zhilian, bavele enkundleni ngoLwesithathu.
Bafunyaniswa benetyala ngomhla wama25 kweyoMdumba kumatyala amaninzi ohlobo lweShedyuli yesithandathu (Schedule 6), aquka ukuthubelezisa abantu, ukungathobeli imithetho yezabasebenzi, kunye nokwaphula umthetho weImmigration Act.
Ijaji uDavid Mhango uwise isigwebo emva kokuba eli qela lifunyanwe linetyala lokuqhuba umzi mveliso ongekho mthethweni eVillage Deep, kumazantsi eGoli, apho bafunyenwe begcine abantu abasuka kwamanye amazwe abangenamaphepha, kuquka nabantwana, betshixelwe behlala phantsi kweemeko ezingakhuselekanga.
Abamangalelwa babanjwa ngo2019 emva kokuba abezomthetho befumene ulwazi malunga nalo mzi mveliso, owawuqhuba phantsi kwegama elithi Beautiful City (Pty) Ltd.
Ugqogqo, olwaqhutywa kweyeNkanga ka2024, lwakhokelela ekuhlangulweni kwabemi baseMozambique abangama37, kuquka nabantwana abangaphantsi kweminyaka eli17 ubudala, ekuxelwe ukuba bangeniswa kweli lizwe ngeekhonteyina zeenqanawa kwaye banyanzelwa ukuba baphile kwaye basebenze phantsi kweemeko ezimbi kakhulu.
Isithethi seeHawks, uColonel Katlego Mogale, uthi eli qela lajongana namatyala amaninzi.
La matyala aquka ukunceda kunye nokuququzelela ukuthubelezisa abantu, ukubophelela, ukuxhamla ekuxhatshazweni kwamaxhoba, kunye nokunceda abaphambukeli abangekho mthethweni ukuba bahlale eMzantsi Afrika.
UMogale uthe umzi mveliso wasilela ukubhalisa ishishini lawo, ukugcina iingxelo zemali, okanye ukunikezela ngeemeko zokusebenza ezikhuselekileyo, nto leyo etyeshela imithetho emininzi yezabasebenzi.
Ityala laye lagqithiswa kwiqela leTrafficking in Persons kwicandelo leSerious Organized Crime Investigation, elathi, ngenkuthalo nokuzimisela okungagungqiyo, laliqhuba eli tyala layokufika ekuwisweni kwesigwebo, utshilo.