UMphathiswa uNqatha noMan B balwela ababhinqileyo ngale nyanga yawo
Imvumi ekwangusomashishini eMpuma Koloni owaziwa njengoMan B Tyekana nothe gqolo ukulwa impatho gadalala ngakumanina.
Image: ABONGILE GINYA
Izinga eliphezulu lezenzo zokuphatheka gadalala kwabantu ababhinqileyo alibonakali lisehla nangona nje yona imizamo nemigushuzo isenziwa. Kungoko inkampani ejongene nokhuseleko ezimeleyo iTyekana Protection Services kaMlindelwa Tyekana nowaziwa ngoMan B izeke mzekweni iza kube ibambisene neSebe loKhuseleko nezoThutho eMpuma Koloni kubanjwe Imbizo apho iza kube ixhobisa abantu ababhinqileyo ngokohlobo abazikhusele ngalo.
Le Imbizo iza kube ikulo Mgqibelo eDrifter Inn, eCambridge, eMonti, nalapho kulindeleke uMphathiswa weSebe uXolile Nqatha enze intetho yosuku.
UNqatha ulincomile eli phulo lenziwa ngulo somashishini, esithi ngenene oku kuyadingeka kwilizwe. "Eli liphulo elilungileyo eliza kwenziwa nguTyekana, ingakumbi ilizwe likwixesha elibi lijongene neengxaki zeGBV. Oku kuyakhuthaza xa iinkampani zabucala zisebenzisana norhulumente ngeenjongo zokulwa nale mingeni uluntu ekuhlaleni lujongene nayo ingakumbi ukuxhatshazwa kwabantu ababhinqileyo," utshilo uNqatha.
UMan B uthi ngamaphulo anje anokuthi avule amehlo wabantu ababhinqileyo ukubona ingozi abajongene nayo. "Kufuneka sibakhusele sikwicandelo loonogada, luxanduva lwethu ukuqinisekisa oko. Kungoko ndibone kubakulekile ukuba sibize bonke abahlali bakaMasipala kuquka namagosa amaSebe ajongene nokhuselelo abeyinxalenye yale Imbizo," utshilo uMan B Tyekana.
Kule Imbizo kukwalindeleke ukuba konwatyiswe noluntu nanjengoko iimvumi eziphantsi kwenkampani kaMan B Tyekana Entertainment ziza kube zicula eqongeni ngeenjongo zokupholisa neentliziyo kumaxhoba eGBV aza kube ekule Imbizo.
USodolophu woMasipala ombaxa iBCMM, uPrincess Faku, isiPolisa, iBuffalo City Law Enforcment kwaneeforam zaseBCMM zilindelekile kule Imbizo.
Ingxelo yophando iveza ukuba eMpuma Koloni izenzo zeGBV kumanina zenziwa ngabantu abasondele kubo abathandana nabo okanye eseleke bathandana nabo.
Uphando lweHuman Sciences Research Council (HRSC) 2024 luthi i33,1% ngabantu ababhinqileyo nabakwiminyaka eyi18 ukwenyuka esele bengamaxhoba okuhlukunyezwa ebomini babo.
UGqirha Nompumelelo Zungu weHSRC, obedakanca olu phando, uthi ubundlobongela ngakumakhosikazi ebala elintsundu liphezulu xa kuthelekiswa naweminye imibala.