INgqungquthela yeeNkokeli zeG20 eMzantsi Afrika ayizulityaziswa nguTrump

UMphathiswa wezoBudlelwane baMazwe ngaMazwe kunye neNtsebenziswano, uRonald Lamola, uthe iNgqungquthela yeeNkokeli zeG20 iya kuqhubeka kweyeNkanga, nokuba uMongameli waseMelika uDonald Trump akathathi nxaxheba.

UMzantsi Afrika kulindeleke ukuba ubambe ingqungquthela yeG20 2025, eza kubanjelwa eGoli kweyeNkanga 2025. Oku kuya kuphawula indibano yokuqala yale mibutho kumhlaba waseAfrika.

ULamola uthethe kwindibano noonondaba ePitoli ngoLwesithathu, esithi akukabikho bungqina bucacileyo bokuba iMelika izozimasa na, emva kokuba uTrump ebonise ukuba angangayi kulo msitho ekhalazela into ayibiza njengokubulawa kwabantu ngenxa yobuhlanga eMzantsi Afrika.

UMzantsi Afrika ubambe ubongameli beG20 obujikelezayo kulo nyaka ka2025, nozakuvala ngengqungquthela yaseGoli kweyeNkanga. Amagosa athi le ndibano iza kugxila kuhlumo loqoqosho olubandakanyayo, ukhuseleko lokutya, kunye nobuchwepheshe beAI ngenjongo yophuhliso oluzinzileyo, oluqulunqwe ziinqobo ezisemgangathweni ezikhuthazwa nguBuntu kunye namanyathelo eManyano yeAfrika eyaziwa ngokuba yiAgenda 2063.

"UTrump uyibeke yacaca into yokuba angangayi kwingqungquthela, ukuza kuthi ga ngoku akukho nto ibonisayo ukuba uza kuthumela igqiza, kodwa uMzantsi Afrika uza kuqhubeka nezicwangciso zawo kwaye ingqungquthela izokwenzeka noMongameli uTrump okanye ngaphandle kwakhe," utshilo uLamola.

Ethetha ngezityholo zokubulawa kwabantu ngokobuhlanga, uLamola uthe la mabango akanasihlahla.

"Kwingxelo yokunyhashwa kwamalungelo abantu njengoko kuchazwe kwingxelo yamva nje yamaLungelo oLuntu yaseMelika ka2024, siyaphinda siyagxininisa ukuba izityholo zokunyhashwa kwamalungelo abantu ezixhaswa ngurhulumente aziyonyani."

Ukwacaphule iinkcukacha manani zokhuseleko lwasemaphandleni ezisuka kwiNkonzo yesiPolisa yoMzantsi Afrika ukuchasa amabango obundlobongela obujoliswe kuluntu oluthile.

Kwikota yesine yonyaka mali ka2024/2025 (1 kweyoMqungu 2025 ukuya kuma31 kweyoKwindla 2025), izehlo ezithandathu zokubulala zenzeka kwiindawo ezisezifama.

ULamola uphawule ukuba amaxhoba aquka abasebenzi abathathu, umhlali wasefama omnye, kunye namafama amabini, exoxa ukuba iinkcukacha zibonisa ulwaphulomthetho lwasezilalini luchaphazela wonke umntu ohlala ezifama kunokuba lujolise kwabantu abathile.

"Ezi nkcukacha manani zisoloko ziphononongwa rhoqo ngekota ngegalelo elivela kubo bonke abachaphazelekayo kukhuseleko lwasemaphandleni," wongeze watsho.

ULamola ugxininise ukuba iajenda yale ngqungquthela iza kuhlala igxile kuhlumo olubandakanyayo, ukhuseleko lokutya, kunye neAI ukuqhubela phambili uphuhliso, ekhokelwa bubuntu kunye neAgenda 2063.

Uphinde wathi uMzantsi Afrika uza kuqhubela phambili namalungiselelo kwaye uza kubamba le ngqungquthela kukho okanye ngaphandle kokuzimasa kweMelika.