iEFF iza kubhena isigwebo senkundla esithi uMalema wenze intetho enentiyo

I-EFF isikhabile isigwebo seNkundla yoLingano, efumanise ukuba amazwi kaJulius Malema yintetho enentiyo kwaye aphembelela udushe.

Umbutho uthi uyalele amagqwetha awo ukuba aphikise esi sigqibo.

''I-EFF sele iyalele amagqwetha awo ukuba aqalise inkqubo yokuphikisa esi sigwebo kwiNkundla ePhakamileyo yeziBheno.''

Kwingxelo ekhutshwe emva kwesigwebo sangoLwesithathu, iEFF ichaze isigwebo "njengokugqwethwa okunzulu kwembali, intanda-bulumko, kunye nobume bentetho yezopolitiko kuluntu lwentando yesininzi."

INkundla yoLingano iye yasixhasa isikhalazo seKomishoni yamaLungelo oLuntu yaseMzantsi Afrika (SAHRC), ngokusekelwe kwizimvo zikaMalema kwiNdlu yoWiso-mthetho yePhondo yesithathu eNtshona Koloni ngomhla we16 kweyeDwarha ka2022.

UMalema wayethe, phakathi kwezinye izinto: "Ungaze woyike ukubulala. Imvukelo ifuna ukuba ngaxa lithile kumele kubekho ukubulalana," kwaye "Ubuhlanga bubundlobongela yaye ubundlobongela kunokupheliswa kuphela ngobundlobongela."

Inkundla yagweba ngelithi la mazwi "anokuthi ngokusengqiqweni athatyathwe njengenjongo ecacileyo yokuphembelela umonakalo," nawophula iCandelo leshumi loMthetho iPromotion of Equality and Prevention of Unfair Discrimination Act (uMthetho wokuLingana).

Ngelixa inkundla yayikuvuma ukubaluleka kwenkululeko yokuthetha, isithi "ngumququzeleli oyimfuneko wentando yesininzi," yathi ilungelo alithetheleli yonke intetho kwaye ayikhuseli intetho ekhuthaza intiyo okanye exhokonxa ubundlobongela.

I-EFF, nangona kunjalo, ithe utoliko lwenkundla luyithathe intetho kaMalema ebisekezelwe kwezopolitiko neengcamango, yayenza isenzo solwaphulomthetho.

Isithethi seEFF, uSinawo Tambo, uthe isigwebo sithatha ngokungathi uluntu alukwazi ukuqonda isikweko sezopolitiko okanye ulwimi lwenguqu.

"Olu toliko luyihlutha intetho yezopolitiko, imbali, kunye neengcamango,inciphisa ukugxeka kwenguqu njengento elulwaphulomthetho.

Umbutho uzithethelela ngelithi le ntetho yayiyindlela yokuphendula kwisiganeko sesikolo samabanga aphakamileyo saseBrackenfell ngo2020, apho abaqhankqalazi abantsundu babethwa kuqhankqalazo lokuchasa ukukhethelwa bucala ngokobuhlanga.

NgokweEFF, amazwi kaMalema ayeyimpendulo kweso siganeko nakwinyani ebanzi yembali yobundlobongela ngokobuhlanga, ingelilo ikhwelo lokuhlasela nabani na.

"Inkundla ayizange izihoye izinto ezintathu ezibalulekileyo," utshilo uTambo.

"Okokuqala, amazwi kaMalema alandela isiganeko saseBrackenfell apho abamhlophe abanocalucalulo babetha abaqhankqalazi abantsundu. Okwesibini, imeko yembali yokuba uMzantsi Afrika wawakhelwe phezu kobundlobongela obujoliswe kubantu abamnyama. Okwesithathu, iEFF ngumbutho osekezelwe kwingcamango yeMarxist-Leninist neFanonian, ngoko ke uhlalutyo lwethu loluntu luqaphela ukuchasana kobume boqoqosho kunye nobuhlanga."

Umbutho umi ngelithi xa uMalema wayethetha "ngemfazwe phakathi kobungangamsha kwabamhlophe kunye nokuzingca kwabantsundu," wayebhekisa kungquzulwano lweengcamango olungangqinelaniyo, hayi olubonakalayo.

UTambo uthe "imfazwe" kuthethwa ngayo "yimfazwe yeengcamango neenkqubo, hayi umyalelo wokubulala abantu abamhlophe."

I-EFF iphinde yalumkisa ngelithi isigwebo simisela umzekelo oyingozi ngokwenza iingcinga zopolitiko ezisekezelwe kwinkolelo yobuntsundu ibe ngulwaphulomthetho. Ityhole inkundla ngokuzoyamisa neenzame zokuvala iingxoxo ezimayelana nenguqu kunye nokuhlaziya ulwimi lwenkululeko ukuphepha ukukhubekisa abo baqhubeka bexhamla kwimbali yentswela bulungisa.

Umbutho uzilwela ngokuthi ulwimi lwenguquko alunakuhlanjululwa ukuze luthuthuzele uvakalelo lwabo bathe gqolo ukonwabela iziqhamo zokuhluthwa umhlaba ngobukoloniyali nabangazange bahlelwe bubundlobongela obusekezelwe kubuhlanga.

''Obona bundlobongela bubunyani bemihla ngemihla bokungabinamhlaba, intswelo ngqesho, nocalucalulo olunyamezelwa ngabantu abantsundu,'' utshilo uThambo.

Ibhekisa kwiCandelo le16 loMgaqo-siseko, elikhusela inkululeko yokuthetha, kuquka nokuvakalisa izimvo ngezopolitiko, iEFF iyigxekile inkundla ngokutyeshela umzekelo omiselweyo.

Ibhekise ngokuthe ngqo kwisigwebo sangaphambili esibandakanya uMalema kunye nokuculwa kwengoma ethi "Bulala iBhulu", apho inkundla ivume ukhuseleko oluphezulu olunikwa intetho yezopolitiko.

"Esi sigwebo asiwuhoyi lo mgaqo kwaye endaweni yoko sixhasa iinzame ezifuna ukujongela phantsi iingxoxo zenguqu," utshilo uTambo.

Ibiza esi sigwebo "ngokuhlaselwa kwentando yesininzi nelungelo lokuthetha ngezopolitiko zotshintsho olululo," iEFF iphinde yazibophelela ekufakeni isibheno.

"Oku asikwenzi nje ukukhusela inkokeli yethu kodwa sikhusela inkululeko yezobupolitika, inyaniso yembali, nelungelo labantu abacinezelweyo ukuba bathethe ngokungafihlisiyo ngokuchasene nengcinezelo yabo," utshilo uTambo.