UGqirha Nomfundo Mcoyi-Zondo umsunguli wenkampani yezoshishino edume kakhulu iCebolethu Group ehleli phantsi enxibe iimpahla ezimhlophe exhagwe ngamanye amanina aphuma kwezoshishino lwabangcwabi.
Image: ABONGILE GINYA
Xa uvuyela ibhinqa eliyinkokheli ufana nje nokuba nawe mntu ubhinqileyo ukuba uyazivuyela ngoba xa kumoshakele akuzukuthiwa kumoshe ibhinqa elinye, kuza kuthiwa ngala mabhinqa. Ezi iintetha zivele ngethuba amabhinqa akushishino lwabangcwabi engungelene eICC eQuigney, eMonti, kuvuyiswana nebhinqa elinguMongameli wokuqala kolu shishino uGqirha Nomfundo Mcoyi-Zondo weCebolethu Group.
UGqirha Mcoyi-Zondo, nofudula ukuba ngutitshalakazi oyinzalelwane yaseKZN, wenze imbali wanguMongameli wokuqala ngqa ukuba linina leSouth African Funeral Practitioners Association (SAFPA) kwiminyaka engama25 ibisoloko ingabantu abangamadoda.
Uthi ukuze amanina aqhubekeke ukubheka phambili abe sezikhundleni, kufuneka axhasane kwaye aphakamisane futhi alwelane. "Masibe ngala manina ashiya umzila, amanina azalelwe ukukhokela, ingakumbi ukuba angahlala ephakamisana. Iminyhadala enje yokudibanisa amanina odwa akushishino iCebolethu Group, injongo yayo kukwenza utshintsho nakwamanye amanina. Kunyaka ozayo xa kuphindwa umnyhadala onje ndirhalela ukuva iindaba ezintle kunezi kula makhosikazi," utshilo uMcoyi-Zondo.
Lo mnyhadala nobutyebe kakhulu ngokolwazi, kuninzi okuthe kwashukuxwa ngokunothi kuncedise ishishini lalowo nalowo kuquka nangohlobo onokuthi uziphathe ngalo, uphathe nangalo abasebenzi kwanabathengi bakho, kukwabalulwe nohlobo omawuyiphathe ngalo imali yeshishini ukuze kubelula ukuba ufumane izibonelelo, inkxaso-mali ukutsho.
Omnye woosomashishini, uNomfundo Makanda, ecebisa uthe, indlela oyisebenzisa ngayo imali kwishishini lakho iyajongwa. Watsho esithi kubalulekile ukuba ikhadi leshishini ungalisebenziseli izinto zakho, ulisebenzisele izinto zeshishini kuba kungangabilula ukuba ufumane inkxaso-mali nanjengoko ezo zinto ziye zijongwe.
UMphathiswa wezeMpilo uNtandokazi Yoliswa Capa kwakunye noMphathi weCebolethu Funeral Group uGqirha Nomfundo Mcoyi-Zondo eICC eQuigney kumnyhadala wamanina.
Image: ABONGILE GINYA
UMakanda uthi okwishishini makaqinisekise ukuba uyarhafa kwaSARS kuba ukungarhafi kwakho kungakuvalela amathuba amaninzi.
Kulo mnyhadala kukwakhuthazwe nokubaluleka kokuthengisa ishishini lakho. Ingcali kwezentengiso, uZama Phakathi weSplendid Marketing uthe: "Nokuba liqhuba kakuhle kangakanani ishishini lakho kodwa kubalulekile ukuba ulifake kwintengiso kwaye ubonakale, futhi linganqabi igama lenkampani okanye ishishini lakho nakumakhasi inxibelelwno."
Inina elikwezomthetho nokwangumbhali weencwadi, uAdvocate Nwabisa Hexana-Nyobole, uthi ukuze ubeyinkokheli yabantu qala ngawe siqu sakho ukwazi ukuzikhokela kwaye ubengumntu ocinga ngobuchule, nokhawuleza ukucinga ube ngumntu ononemibono xa uyinkokheli.
"Zisondeze kumntu okwelicandelo ukulo okanye olinqwenelayo ukuze kube lula. Xa ukwishishini ungumntu obhinqileyo uyadeleleka, kungoko kufuneka ungoyiki uqiniseke nangeshishini lakho. Funda kwiimpazamo zakho kwaye ukulungele nokujamelana nemicelimngeni ogagana nayo kwishishini," uvale ngelo uHexana-Nyobole.
UMphathiswa wezeMpilo eMpuma Koloni, uNtandokazi Yoliswa Capa, nobezimase lo mnyhadala wamanina, uthi amanina ngabantu abathandanayo mabahlale bethandana kwaye bexhasana kuba angaya kude. Uthi kunzima ukuba linina elikhokeleyo kuba kufuneka usoloko uzibonakalisa ukuba unako.
Kulo mnhyadala ibingengomanina aphuma eMpuma Koloni kuphela, ebedibene namanina ebesuka kuwo onke amaPhondo aseMzantsi Afrika.