Akayinikwanga ibheyile obandakanyeka kuphango olushiye oonogada abanini bebhubhile eMonti
Kubhubhe oonogada ababini eMonti abasebenzela inkampani ethwala imali uFidelity Cash Solutions ngoMvulo kule veki ngethuba bephangwa ngabarhanelwa abane.
Image: Reaction Unit South Africa
Uvele kwiNkundla yamaTyala eMonti ngoLwesithathu umrhanelwa omnye kwabane abathe baphanga imoto ethwala imali kwivenkile ekwisitalato iBuffalo kumbindi wedolophu eMonti, nalapho kuye kwadutyulwa kwabhubha ababini oonogada.
Lo mrhanelwa nogama lakhe inguSiphelo Mkhaliphi (37), ubanjwe kuhola wendlela uN2 eNanaga kude kufuphi naseBhayi ngethuba eqhuba imoto embala umhlophe yakwaSuzuki Ertiga nekukholelwa ukuba ibiyiyo esetyenziswe ekuphangeni ngethuba bekuqhekezwa eMonti.
Esi sehlo senzeke ngoMvulo kule veki ngethuba imoto ethwala imali yenkampani uFidelity Cash Solution ibiyoqokelela imali kwivenkile uCash and Carry oseBuffalo kusasa.
Ingxelo ephuma kuWarrant Officer Ndiphiwe Mhlakuvana, ithi, abathathu oonogada bebeshiyeke ngaphakathi emotweni, omnye engaphakathi eyokuthatha imali.
UMhlakuvana uthi unogada uphume evenkileni ephethe ibhegi enombala otyheli nebinemali nabathe bahlaselwa xa bencedisana nabanye beyilayisha ngaphakathi emotweni. Ngethuba besancedisana kuqhambuke amadoda amane exhobe ngemipu badubula kwabhubha unogada omnye oneminyaka engamashumi amane anesine (44) ubudala noye wabhubhela kwindawo leyo yexhwayelo, owesibini yena kuthiwa ubhubhele esibhedlele.
Abarhanelwa bemke nesixa semali esingachazangwa. Kuphando olweniwe ziiHawks, imoto ebebehamba ngayo la mzuzu iHyundai embala ugreyi ifunyenwe inyengezwe eParkside eMonti.
UMkhaliphi akayinikwangawa ibheyile izolo ngethuba evela eMonti, ungaphakathi eziseleni nalapho aza kuvela ngoLwesithathu kwiveki ezayo apho eza kufaka isicelo sebheyile.