Ukubulawa kweentatheli zeAl Jazeera kuphakamisa inkxalabo yenkululeko yeendaba
Abantu baseGaza, kuquka neentatheli, ngethuba benika imbeko iintatheli zeAl Jazeera eziswelekileyo.
Image: The Cradle/X
Kusangena amazwi ovelwano kwiintatheli zeAl Jazeera ezibulewe eGaza, kwaye kukho inkxalabo yokuphazanyiswa kwenkululeko yamajelo eendaba ngeenzame zokuvala imilomo yeentatheli.
Iintatheli uAnas Al-Sharif kunye noMohammed Qreiqeh, abafoti uIbrahim Zaher kunye noMoamen Aliwa, kunye nomncedisi wabo uMohammed Noufal, babhubhe emva kokuhlaselwa kwentente kufuphi nesibhedlele saseAl Shifa eGaza, ngokweengxelo.
Umkhosi wamaSirayeli ukuthethelele uhlaselo, ubanga ukuba uSharif, wayeyintloko yeqela labanqolobi leHamas kwaye "wayezenza intatheli" kuphela – la mabango kudala akhatywa nguSharif ngokwakhe, iAl Jazeera kunye neKomiti yokukhusela iintatheli (CPJ).
Intatheli yesithandathu ebizwa ngokuba nguMohammad al Khaldi nayo yabulawa kuhlaselo, ngokokutsho kwabasebenzi bezonyango kwisibhedlele iAl Shifa ngokweReuters.
Umngcwabo obubanjelwe eGaza ngeCawa ebusuku ubanjelwe iintatheli zeAl Jazeera ezihlaselwe ngumkhosi wamaSirayeli.
IAl Jazeera ilugxekile uhlaselo lweentatheli zayo. "IAl Jazeera Media Network ikugxeka kabukhali ukubulawa kweentatheli zayo ngumkhosi wamaSirayeli kolunye uhlaselo olucacileyo nolucwangcisiweyo ngakwinkululeko yamajelo eendaba," itshilo kwingxelo.
IAl Jazeera ithe xa besithi ndlelantle kwelinye iqela leentatheli zabo ezenze umsebenzi wabo "ngesibindi nangenkalipho" bebalisa usizi laseGaza kunye nabantu bayo ukusukela oko kwaqala imfazwe – ithi isola umkhosi wamaSirayeli norhulumente, ibabeka ityala lokubulala ngabom iintatheli zayo.
Ziintatheli ezingama270 ezibulewe ngumkhosi wamaSirayeli kwiinyanga ezingama22 zemfazwe, ngokutsho kweAl Jazeera.