ConCourt iza kuwisa isigwebo kwityala leMKP ngakuRamaphosa ekuhambeni kwexesha

INkundla yoMgaqo-siseko isisigcinile isigwebo kwityala eliziswe yiMK Party ngakuMongameli Cyril Ramaphosa, kulandela isigqibo sakhe sokubeka uMphathiswa uSenzo Mchunu kwikhefu elikhethekileyo kunye nokuchongwa kukaNjingalwazi Firoz Cachalia njengoMphathiswa obambeleyo wamaPolisa.

Ityala, nebelichotshelwe eGoli ngoLwesithathu, ligxile ekubeni semthethweni nokungqinelana nomgaqo-siseko kwenyathelo likaRamaphosa lokususa uMchunu okwethutyana emva kwezityholo zokungenelela kwezopolitiko kumsebenzi wamapolisa kunye nokuziphatha okungekho mthethweni okwenziwe nguMkomishinala wamaPolisa eKZN uLt-Gen. Nhlanhla Mkhwanazi.

Lo mba uphinde ucele umngeni kwisigqibo sikaMongameli esilandelayo sokumisela uCachalia njengoMphathiswa obambeleyo wamaPolisa – nangona uCachalia engelilo ilungu leKhabhinethi.

Ethethela iMKP, uAdvocate Dali Mpofu uchaze izenzo zikaRamaphosa "njengezichasene nomgaqo-siseko nangaphaya kwamandla akhe."

Uxelele inkundla ukuba uRamaphosa ugqithise amagunya akhe omgaqo-siseko ngokubeka uMchunu kwikhefu elikhethekileyo emva koko anike umntu ongaphandle kweKhabhinethi imisebenzi yakhe yobuphathiswa.

NgokukaMpofu, la manyathelo achasene neCandelo lama98 loMgaqo-siseko, elilawula ukuqeshwa kwabaphathiswa ababambeleyo xa ilungu leKhabhinethi lingekho okanye lingakwazi ukwenza izinto.

"Xa uMongameli wathi, 'Ndigqibe kwelokuba ndibeke uMphathiswa uSenzo Mchunu ekhefini kwangoko,' waphinda wathi, 'Ndigqibe ekubeni ndityumbe uNjingalwazi uFiroz Cachalia njengoMphathiswa obambeleyo wamaPolisa,' ezi yayizizigqibo eziqinisekileyo nezigqibeleleyo," utshilo uMpofu exhasa ingxoxo yakhe esithi uMongameli wayengqale kwaye engaqiqi.

Ngoku uMongameli ufuna ukutshintsha intetho atolike amazwi akhe ngenye indlela ebhidisa ngokungeyomfuneko kwaye ejongela phantsi ukucaca komgaqo-siseko, utshilo.

Ebuzwa nguJustice uOwen Rogers malunga nokuba uMongameli mhlawumbi angalibamba igunya lokunika ikhefu elinjalo, uMpofu uye wayikhaba loo nto.

"UMongameli akanawo amagunya okubeka abaphathiswa kwikhefu elikhethekileyo. Ukuba umgaqo-siseko awukuvumeli ngokuphandle oko, akuvumelekanga," utshilo.

IMKP yanyanzelisa ukuba uMongameli wenze impazamo ngokumisela uCachalia, ongelilo ilungu leKhabhinethi, njengoMphathiswa wamaPolisa obambeleyo.

Esi sikhundla besibanjwe okwexeshana nguMphathiswa weMithombo yeziMbiwa uGwede Mantashe de uCachalia aqalise ukusebenza ngomhla wokuqala kweyeThupha.

"Ukuchongwa kukaCachalia akukho semthethweni," utshilo uMpofu.

"Icandelo lama98 ligunyazisa ukuba lilungu leKhabhinethi kuphela elinokuchongwa ukuba libambe indawo yomnye. Ukusilela kukaRamaphosa ekuthobeleni kukwaphula isibophelelo somgaqo-siseko."

Iqela lamagqwetha kaMchunu liphendule ngokugxeka iintetho zeMK Party njengezicingelayo nezingafanelekanga ngokwasemthethweni.

Kwiingxoxo zabo, bathi iMK Party yenze ngokungathi izityholo ngakuMchunu — ingakumbi ukuba uxokise ePalamente ngokwazana kwakhe notyholwa ngokuba sisikrelemnqa uBrown Mogotsi — zibubungqina obubambekayo.

Baxoxa ngelithi iMKP yazama ukunyanzela uMongameli ukuba amgxothe uMchunu ngokusekelwe kumabango angenabungqina.

IConCourt iye yasigcina isigwebo sayo, ibonisa ukuba iya kuwisa isigwebo ekuhambeni kwexesha.