Eleenkundla lifuna ubungqina kuMkhwanazi ngezityholo ezinobuzaza
Eleenkundla libongoze uMphathi wamaPolisa KwaZulu-Natal uLieutenant General Nhlanhla Mkhwanazi ukuba anike ubungqina obuxhasa izityholo zakhe ezinobuzaza ngakumagosa aphezulu nazenze kutshanje.
Image: Thobile Mathonsi
Eleenkundla lihlabe ikhwelo kuMkomishinala wamaPolisa KwaZulu-Natal uLieutenant General Nhlanhla Mkhwanazi ukuba anike ubungqina bokuxhasa izityholo azibeke kumagosa aphezulu ngethuba ethetha noonondaba kwimpelaveki.
Ngethuba ethetha noonondaba ngeCawe kwaye enxibe iyunifomu yakhe yeSpecial Task Force, uMkhwanazi utyhole uMphathiswa wamaPolisa uSenzo Mchunu, ugxa wakhe uBrown Mogotsi kunye noSekela Mkomishinala kazwelonke uLieutenant General Shadrack Sibiya, njengabantu abaphambili kwizityholo zokungenelela kwimisebenzi yamapolisa, kuquka nokuchithwa kwegqiza elaliphanda ngokubulawa koosopolitiki.
IOfisi yeJaji eyiNtloko (OCJ) ithe ithathele ingqalelo intetho yamva nje kaMkhwanazi apho athe watyhola intsebenziswano phakathi kwabanye awababizayo, eleenkundla kunye nabaphuli mthetho.
"Amabango anjalo, enziwa ngaphandle kobungqina, ayonakalisa kakhulu ukuzithemba koluntu kwinkululeko kunye nesidima seenkundla zethu," itshilo iOCJ.
"Ngalo mba, uNobhala Jikelele oBambeleyo weOfisi yeJaji eyiNtloko, ucele ngokusesikweni uMkomishinala kazwelonke weSAPS kunye noMkomishinala wePhondo uLieutenant General Mkhwanazi, ukuba banike ubungqina obuxhasa ezi zityholo kwaye bafake izikhalazo ezisesikweni, apho kuyimfuneko, kwiKomishoni yeNkonzo yeeJaji (JSC) okanye kwiKomishoni yooMantyi," yongeza yatsho iOCJ.
IJaji eyiNtloko uMandisa Maya uchaze ukuba eleenkundla limi ngokungagungqiyo ekuzinikeleni kwalo ekuphenduleni okanye ukuthatha uxanduva.
"Ukuba nabani na, kuquka noLieutenant General Mkhwanazi, unobungqina obubambekayo bokuziphatha okungekho mthethweni okanye okungafanelekanga okwenziwe lilungu leeNkundla, bayabongozwa ukuba baxele imicimbi elolu hlobo kwizigqeba zombuso ezigunyaziswe ngumthetho.
"Izityholo ezingenasihlahla zijongela phantsi ulawulo lobulungisa kwaye zenza buthathaka ukuthenjwa kwamaziko ethu luluntu nto leyo ibalulekileyo ekuxhaseni idemokhrasi yethu yomgaqo-siseko," utshilo.