Ugwetyiwe owahlaba ibhinqa kuba lithengisa ikepusi nezihlangu zalo!
Indoda yaKwaMaqoma igwetywe iminyaka elishumi (10) ingaphakathi ejele ngokuhlaba inkosikazi ibizisebenzela kuba weva ukuba ithengisa iimpahla ekholelwa ukuba zezayo.
Image: Umfanekiso ogciniweyo
Uza kuchitha iminyaka elishumi (10) engaphakathi ejele uNkosiphendule Ngqoba (31) waKwaMaqoma, idolophu eyayisaziwa ngokuba kuseFort Beaufort, eMpuma Koloni, emva kokuba iNkundla yeNgingqi yaKwaMaqoma imfumene enetyala lokuzama ukubulala obengumsebenzi ezifama uNomawethu Phatikhala (34).
Ngomhla wesithandathu (6) kweyoMqungu wonyaka ophelileyo u2024 edolophini KwaMaqoma kwisitalato iGoma-Goma, uNgqoba weva ukuba uNomawethu uthengisa ikepusi kwakunye neeteki nawakholelwa [uNgqoba] ukuba zezakhe ebezilahlekile.
Ingxelo ephuma kwisithethi seNPA, uLuxolo Tyali, ithi ukufika kwakhe wafika sele ekhupha imela enkqangisa uNomawethu ngezi mpahla emva koko wabe sele emhlaba esiswini, ekubalekeni kwalo ixhoba lawa waliphinda uNgqoba emqolo nasemagxeni ngemela de labe lihlangulwa ngamakhosikazi amabini sele liphelelwa ngamandla ixhoba nelaye labalekiselwa kwisibhedlele iFort Beaufort Hospital emva koko lathunyelwa kwisibhedlele saseMonti iFrere Hospital ngenxa yobubi bemeko.
UNgqoba waye wabanjwa ngomhla wama21 kwakweyoMqungu.
UMtshutshisi weNkundla, uThanduxolo Maxhaulana, uxelele inkundla ukuba uNgqoba ebezimisele ukulibulala ixhoba yatsho inkundla iphakamisa nobungqina babo babezibonele ngethuba kusenzeka oku.
UNgqoba ngethuba kuqhuba ityala lakhe udize ukuba ityala akanalo. Ekuphikeni kwakhe phambi kwenkundla, uthe akakhange alihlabe ixhoba koko walingxolisa elibuza ngezi mpahla lizithengisayo elileqa lawa lonzakala. Uthi amanxeba la wawafumana ngokuwa lonzakala hayi ukuba walihlaba. Inkundla iye yayikhabela kude lo ngxelo isithi amanxeba anawo ixhoba ngawokuhlatywa hayi ukuwa.
UBarry Madolo, noyiNtloko kwezoTshutshiso eMpuma Koloni usamkele esi sigwebo. UMadolo ukwaqhwabele izandla oogxa bakhe ngomsebenzi wabo.