Kubhaqwe iziyobisi phantsi kwebhedi yenkosikazi yaseMpuma Koloni
Iziyobisi ezibhaqwe phantsi komatrasi, ezinye zabhaqwa kwityesi kwigumbi lenkosikazi yaseMaletswai.
Image: SAPS
AmaPolisa aseMpuma Koloni abambe inkosikazi enamashumi amathathu anesine (34) yaseMaletswai, neyindawo eyayisaziwa ngokuba yiAliwal North, emva kokuba ebhaqe iintlobo ezahlukeneyo zeziyobisi kwigumbi lale nkosikazi.
Le nkosikazi, 34, ibanjwe emini ngoMvulo kule veki kwikhaya layo elikwisitalato iAngelier kwilokishi iHilton eMaletswai ngethuba abecandelo leK9 besenza ugqogqa lwawo.
Ingxelo ithi iipakethana eziyi18 zecrystal methamphetamine zibhaqwe phantsi komatrasi, ze iipilisi eziyi30 zemandrax zabhaqwa kwityesi kwakweli gumbi lokulala lale nkosikazi.
UMkomishinala weSithili oBambeleyo, uColonel Zingiza Manqoyi, uqhwabele izandla eli qela lecandelo leK9 ngomsebenzi omhle eliwenzileyo. UManqoyi uncome ukuzinikela kwanokusebenza kwalo.
UCaptain Ursula Roelofse, uthi, ibanjiwe le nkosikazi kwaye ijongene netyala lokufunyanwa ineziyobisi kwaye ikwashishina ngazo. Kulindeleke ukuba ivele phambi koMantyi.