Fanta: ‘Ityala siliphosa kuni bootata, makungadlwengulwa kubulawe amanina nikhona’
EKUQALENI: NguPetros Majola weKhula Development Community Projet, uMfundisi Toto, Bishop Mfaca, uMphathiswa uBukiwe Fanta kwakunye noSodolophu waseMnquma uThunyiswa Manxila-Nkamisa kwikhaya lakwaMbayimbayi eBawa eGcuwa.
Image: ABONGILE GINYA
Uhlab’ ikhwelo kumntu ongutata, ongumfana noyinkwenkwe uMphathiswa weSebe loPhuhliso loLuntu eMpuma Koloni uBukiwe Fanta esithi mawangayekeli umxakatho ababhinqileyo babe ngamaxhoba okudlwengulwa nokubulawa ezilalini bekhona, mabakhusele abafazi babo, oomama babo, odade babo neentombi zawo. UFanta ukutsho oku ngoMvulo ngethuba etyelele ikhaya lenkondekazi egetyengiweyo eBawa koMkhulu eMnquma.
UNontsumpa Mbayimbayi ,102, ufunyenwe egumbini lakhe ngentsasa yangoLwesine kwiveki ephelileyo sele ebhubhile. Amapolisa akholelwa ukuba uhlaselwe ngobusuku bangoLwesithathu. ULieutenant Colonel Siphokazi Mawisa uthi le nkondekazi ifunyenwe inamanxeba okuhlatywa kumzimba ongentla kwaye idlwengulwe. Umrhanelwa wangena ngefestile.
Isiganeko sokubulawa kabuhlungu somntu obhinqileyo ayisosokuqala sisenzeka kule lali, kokwesine ngokudizwa nguSodolophu waseMnquma, uThunyiswa Manxila-Nkamisa, nobe kweli khaya naye ekhaphe uMphathiswa.
“Bekufanele silapha kuba sizokonwabisa le nkondekazi sibhiyozela le minyaka ibinayo hayi ukuba sizokulila, ingakumbi ngohlobo athe wabhubha ngalo. Sikweva nokuba lixhoba lesine eli apha, siyakukhalimela ke oko futhi siyafunga sigqibelisile kungaphinde kwenzeke oku nikhona madoda. Anditsho kumadoda ale ndawo qha, nditsho kuwo onke amadoda asezilalini eMpuma Koloni, mazingenzeki iziganeko ezinje nikhona.
“Ningamadoda okuthini bootata xa kunje. Ityala siliphosa kuni, uThixo wabeka ukuba nibe ziintloko zamakhaya, dlalani indima ke bakhusele abafazi benu, abantwana benu, noomama benu,” utshilo uFanta.
UMphathiswa Bukiwe Fanta, phakathi nguSodolophu Thunyiswa Manxiwa-Nkamisa kwakunye noweKhula Community Development Project uPetros Majola beyokugxwala emswaneni kwikhaya lenkondekazi uNontsumpa Mbayimbayi (102) ogetyengiweyo eBawa eGcuwa.
Image: ABONGILE GINYA
USodolophu uManxila-Nkamisa uthi sele beqalisile ukuqhuba neembizo kwiiwadi zabo, ingakumbi ezisezilalini. UManxiwa-Nkamisa uthi akukho zinzame zingenziwayo kummandla waseMnquma ukunqanda le mikhuba kodwa akude kubekho tshintsho. Uthi eli lixhoba lesine kungazange kubanjwe mntu kodwa kunjalo abazukuyeka ukuhewula.
OweKhula Community Development Project, uPetros Majola, nobekweli khaya naye uzeke mzekweni eyalela ilali, ingakumbi amadoda, esithi ngowabo lo mthwalo mabafune umrhanelwa babuye naye ukukhusela oomama nabantwana.
INkosi yendawo, uMasimthembe Nqenqe, nokhahlelwa ngelikaGabulizigcawu igama, naye ethetha neli phephandaba I’solezwe lesiXhosa, uthi akukho lula ukuphatha emncinci abantu abadala kuba bayamdelela kwaye abenzi ngokohlobo anqwenela ngalo.
Le Nkosi ithi yabiza indibano emva kwesi sehlo ekubeni kuyiwe kweli khaya kodwa bashiyeka bebabini kuphela amadoda elali. Uthi ebebize nenye indibano kuMgqibelo odlulileyo khange kubekho nenye indoda ezidinileyo ngokuya kuloo ndibano.
Ngethuba kusehla esi sehlo kweli khaya, umakoti wale nkondekazi, uNolusapho Mbayimbayi (70), naye osele ekhulile ngokweminyaka, ebelele kwenye indlu.
Ingxelo esizive ngaphakathi kolu sapho kukuba ukhona umrhanelwa osancwinwa ngabecuphi baseGcuwa malunga nesi sehlo, nangona amapolisa ebengekazidizi ezo ndaba. Le nkondekazi iyangcwatywa ngomhla we19 kweyeKhala.
UBishop Mfaca nobemele isifundisi saseMpuma Koloni obebopha olu sapho ulishiye nencwadi yeBhayibhile kaMarko 50.