Ubanjiwe oxhwile wabulala intwazana ibithunywe emini evenkileni!
ULithaliyanda Ntoni (12) obhaqwe sele ebhubhile nobephume emini esiya evenkileni kowabo eMotherwell.
Image: SAPS
Intwazana eselula, uLithaliyanda Ntoni (12) wesitalato iLuzipho, kwaNU10, eMotherwell nobechazwe ngoLwesibini kule veki njengobelahlekile, umzimba wakhe ubhaqwe emva kosuku edukile kwihlathi elikwisitalato iKhabonqaba kwaNU6, eMotherwell kusasa ngoLwesihlanu.
Ngokwengxelo ekhutshwe ngamaPolisa ngoLwesine, uLithaliyanda uphume emva kwentsimbi yesine emalanga kowabo esiya kwivenkile aqhele ukuya kuyo ekufutshane nakowabo eyokuthenga isonka akaphinda abuye.
UBrigadier Nobuntu Gantana uthi amaPolisa abambe indoda (39) malunga neli tyala. Le ndoda ijongene netyala lokuxhwila nokubulala.
UMajor General Thandiswa Kupiso, nobambeleyo njengoMkomishinala wamaPolisa eMpuma Koloni, uthi nangona bekuvuyela kwaye bencoma ukubanjwa komrhanelwa ngokukhawuleza, ukubulawa komntwana kanje kubothusile kwaye kothuse noluntu ngobubanzi.