Ubomi ejele kobulele uyise
A man and a woman embracing UMologadi Magdeline Mehlape notata wakhe uGqirha Malekutu Johannes Mehlape.
Image: Facebook
Inkosikazi eneminyaka engamashumi amabini anesibhozo (28) eyavuma ityala lokubulala utata wayo kuba ikholelwa ukuba nguye obangele ukubhubha kukanina ibanjelwe ubomi entolongweni.
UMologadi Magdeline Mehlape ugwetywe kwiNkundla ePhakamileyo yasePolokwane ngoLwesithathu.
IGunyabantu lezoTshutshiso (NPA) lithe nangona uMehlape evume ityala, inkundla yawisa isigwebo esimiselweyo kuba uMbuso ukholelwa ukuba isicelo eso siphenjelelwa bubungqina obuninzi endaweni yokuzisola.
UMehlape wabulala utata wakhe uGqirha Malekutu Johannes Mehlape, owayenguMphathi weSekethe kwiSebe leMfundo laseLimpopo ngomhla wama28 kweyoMnga ka2023.
INPA ithe uMehlape nguye owaququzelela esi senzo sokubulala kulandela amabango enziwa lixhwele, elatyhola ngelithi uyise nguye obangele ukubhubha kukanina ngokusebenzisa “umthi”.
"Xa iinzame zokuziphindezela ngokusebenzisa umthi zingaphumelelanga, uMehlape uye wacela uncedo kumalungu osapho ohlukeneyo ukuba aqeshe umbulali, wavuma ukuhlawula iR200 000 ngesi senzo sokubulala," sicacise satsho isithethi seNPA uMashudu Malabi-Dzhangi.
Inkundla yaxelelwa ukuba ngobusuku besiganeko sokubulala, uMehlape wavula isango kunye nomnyango, evumela abenzi bobubi ukuba bangene endlini.
UMalekutu wahlaselwa kwigumbi lakhe lokulala elele, wadutyulwa izihlandlo eziliqela, waphangwa nezinto ezininzi zexabiso kuquka nefowuni yakhe.
Imoto yohlobo lweFord Ranger Double Cab ekukholelwa ukuba yasetyenziswa ngexesha lolwaphulomthetho yathinjwa ngethuba kubanjwa abantu eMankweng, kwaze kwafunyanwa umpu ekutyholwa ukuba wawusetyenziswe kwesi sehlo sokubulala xa kwakubanjwa eZebediela.
Kukwabanjwe nabanye abane malunga nesi senzo sokubulala abaquka ixhwele uMahlodi Melida Mathole, 34.
Abanye abatyholwa abathathu nguTshepo Gabriel Ranoto, uHlologelo Klaas Mogotlane, bobabini abaminyaka ingama34, noMichael Sello Molongoane, 42.
Amatyala abo ahluliwe kwaye kulindeleke ukuba avele enkundleni ngomhla wama20 kweyeSilimela 2025 ukuze axoxwe.
Bajongene nezityholo zokuqulunqa iyelenqe lokubulala, ukubulala, ukuphanga ngeemeko ezimanyumnyezi, nokuba nemipu neembumbulu ngaphandle kwempepha.
UMehlape uxolise kusapho lwakhe, esithi nguye umntu obekhathelela intombi yakhe encinci kwaye wayeneengxaki ezingekasonjululwa noyise.