Abahlali baseGoli bathi abafuni oosodolophu beDA

Abanye abahlali baseGoli bavakalise ukuba abafuni kwanto ibadibanisa noosodolophu beDemocratic Alliance (DA).

Oku kuza emva kokuba usihlalo webhunga leDA, uHelen Zille, evakalise ukuba ujonge ugxeleshe isikhundla sikasodolophu wesixeko saseGoli kunyulo loorhulumente basemakhaya ngo2026.

UZille uqinisekise kwi-IOL News kwimpelaveki ukuba ujonge ukuba ngusodolophu olandelayo wesixeko saseGoli.

Uqinisekisile ukuba uye wacelwa ukuba angenele njengomgqatswa wombutho kwaye ngoku usacinga ngesigqibo esifanelekileyo amele asenze.

Ezi ndaba zibangele izimvo ezahlukeneyo eluntwini nezigxeko ezivakaliswe yimibutho ephikisayo, equka iEconomic Freedom Fighters (EFF) kunye neActionSA.

Nangona abanye abahlali bemxhasa uZille ukuba ngumgqatswa, abanye bambona njengophawu lokubuyela umva kwezopolitiko.

UZille ubambe izikhundla ezininzi eziphezulu kwiDA, eziquka inkokeli yombutho, inkulumbuso yeNtshona Koloni, kunye nosodolophu waseKapa.

Nangona kunjalo, imbali yakhe, ingakumbi izityholo zokungahoywa koluntu oluntsundu olufana noluhlala eKhayelitsha, isenokuzisa imingeni xa ekhetha ukuba ngumgqatswa elwela isikhundla sikasodolophu eGoli.

IGoli isajongene nemicelimngeni enzulu, equka ukunqongophala kwamanzi, ukuphela kombane, izakhiwo apho abantu bahlala ngokungekho mthethweni, iindlela ezinezigingqi, iirobhothi ezingasebenzi kakuhle, ukuwohloka kweziseko ezingundoqo, inkunkuma engaqokelelwa, ukuxinana kwamatyotyombe, kunye nolwaphulomthetho oluxhaphakileyo.

Kule minyaka isibhozo idlulileyo, esi sixeko besinoosodolophu abalithoba abavela kumaqela ngamaqela, kodwa unikezelo lweenkonzo luye lwehla ngokuthe ngcembe.

Usodolophu okhoyo ngoku, uDada Morero, weAfrican National Congress (ANC) ukwagxekwa ngabahlali kwanabezopolitiko bamaqela aphikisayo ngokusilela ukuyilungisa le miba.

UMorero kutshanje uye wazisa inyathelo ibomb squad ukukhawulezisa ukuhanjiswa kweenkonzo kwisixeko sonke.

Ngaphandle koku, abahlali abaninzi bathi imeko yabo yokuhlala isembi.

Ethetha neIOL News, uPatrick Mohlomphegi, 53, waseMeadowlands, eZone 7, eSoweto, uvakalise ukuphoxeka kubunkokeli bukaMorero watsho esithi makubuyiswe inkokeli yeActionSA uHerman Mashaba.

"Ndicinga ukuba uHerman Mashaba angangoyena sodolophu ungcono, xa kuthelekiswa nokhoyo ngoku," utshilo uMohlomphegi.

UMashaba usebenze njengosodolophu waseGoli ukusukela ngo2016 ukuya ku2019 phantsi kweDA.

"Ngexesha lakhe, isixeko sasinezigingqi ezimbalwa, iPick It Up yayisebenza, kwaye safumana uphicotho zincwadi olufanelekileyo. I-DA yamsusa esihlalweni kuba wayebodlula; akazange ayilandele iajenda yabo."

UPhumelelo Mgunuzu, 34, osuka kumatyotyombe aseKya Sands kufutshane neCosmo City, naye uvumile.

"Sibe noosodolophu abaninzi, kwaye akukho namnye umntu owenze into ebhetele. UMashaba ebengcono. Besikwazi ukubona ukuhanjiswa kweenkonzo ngexesha lakhe," uxelele i-IOL News.

Lo mmandla ujongene nokusilela okukhulu ekuhanjisweni kweenkonzo, okuquka ukunqongophala kwamanzi, inkunkuma engaqokelelwa, kunye nokufakelwa kombane ngokungekho mthethweni.

Nangona kugxekwa kabukhali, abanye basazikhethela uMorero.

UEmily Makolometša, umhlali waseAlexandra, uthe uza kumvotela [uMorero] kwakhona nangona kukho imiba esafuna ukulungiswa efana nezindlu, ugutyulo, kunye neziseko ezingundoqo kulo mmandla.

"Ndizikhethela uDada Morero," utshilo.

"Akazukonwabisa wonke umntu, kodwa siyalubona utshintsho, inkunkuma iyaqokelelwa kwaye sinawo namanzi. Asiyifuni iDA kuba ooceba babo bahambela abo basezidolophini kuphela, hayi ezilokishini."

Kusenjalo, ngoMvulo, i-IOL News inike ingxelo yokuba uMashaba, ngoku okhokela iActionSA, akaphozisanga maseko ekugxekeni uZille, esithi "ngoyena mntu ombi ukusebenza naye."

"IGoli ayifuni mntu ofana noHelen Zille," uMashaba uxelele i-IOL News.

"Udale olona luntu lungalinganiyo eNtshona Koloni. Izenzo zakhe ziyazithethela."

Usihlalo weEFF eGauteng, uNkululeko Dunga, naye akakhange avumelane nesigqibo sokuba uZille alwele isikhundla sikasodolophu.

"Umgqatswa weDA ofana noZille sisigqibo esibi," utshilo uDunga.

"Bazama ukuqinisa iivoti zabo ezivela kubantu abamhlophe baseGoli, njengokuba benzile kuzwelonke ngokususa iinkokeli ezimnyama bafaka abamhlophe. Oku akukho malunga nokukhonza abantu."